Зыныбжь хэкIотагъэхэм гаджет зэфэшъхьафхэм хэшIыкI фыряIэ­нымкIэ, ахэм Iоф арашIэнымкIэ зэхащэрэ егъэджэнхэр бэмышIэу аублагъэх.

[caption id="attachment_146481" align="aligncenter" width="800"] Фото: Артур Лаутеншлегер.[/caption]

2018-рэ илъэсым къыщегъэ­жьагъэу АР-м ипенсионерхэм я Союз Мыекъопэ къэралыгъо технологическэ университетым зэзэгъыныгъэ дишIыгъэу шIоигъоныгъэ зиIэхэм яшIэныгъэхэм ахагъахъо, илъэсым къыкIоцI егъэджэнхэр афызэхащэх. Джырэ уахътэм Джэджэ районым къикIырэ нэбгырэ 20 рагъаджэ. Компьютерым щыIэныгъэм чIыпIэ гъэнэфагъэ зэрэщиубытырэм къыхэкIэу зыныбжь хэкIотагъэхэм ыпкIэ хэмылъэу ар зэрагъэшIэным мэхьанэшхо иI. КъэбарлъыгъэIэс щынэгъончъэнымкIэ ыкIи прикладной ин­форматикэмкIэ кафедрэм ипащэу Цундышк Вячеслав къы­зэрэтиIуагъэмкIэ, егъэджэнхэр тIоу гощыгъэу афызэхащэщт. Компьютерым хэшIыкI фыря­Iэнэу, операционнэ, къэбарлъы­гъэIэс ыкIи федеральнэ мэхьанэ зиIэ системэхэм хэшIыкI афыряIэнэу, макъэхэм, тхыгъэхэм Iоф зэрадэпшIэщтыр, таблицэхэр зэрэпшIыщтхэр арагъэлъэгъущт. Ащ нэмыкIэу Интернетыр, социальнэ хъытыухэр щынэгъончъэу зэрэбгъэфедэщтхэр къафаIотэщт. Сыхьат 32-рэ мы егъэджэнхэм атырагъэкIодэщт. ЯтIонэрэ лъэныкъор телефонхэм, планшетхэм нахь афэгъэ­хьыгъэщт. Сыхьат 16-м къыкIоцI программэ зэфэшъхьафхэм Iоф арашIэнэу зыныбжь хэкIотагъэхэр агъэсэщтых. Джэджэ районым ипенсионер­хэр фэчэфэу егъэджэн сы­хьат­хэм къякIуалIэх. Ахэм ащыщ­хэм гущыIэгъу тафэхъугъ. Галина Волошинар пенсием кIуагъэ нахь мышIэми, общест­веннэ IофшIэныр чанэу егъэцакIэ, хэушъхьафыкIыгъэ дзэ операцием щыIэхэм апае гу­манитар IэпыIэгъур зыугъои­хэрэм ахэт. — БэшIагъэ компьютерыр нахь игъэкIотыгъэу зэзгъэшIэнэу сызыфэягъэр, сыда пIомэ электроннэ шIыкIэр тищыIэныгъэ щыщ хъугъэ. Къэралыгъо фэIо-­фашIэхэмкIэ порталыр нахь згъэфедэзэ сшIыщт, джащ фэдэу чэзыухэм уахэмытэу коммунальнэхэри птынхэ олъэкIы. Мыщ фэдэ ыпкIэ зыхэмылъ егъэджэнхэр зэрэзэхащэхэрэм мэхьанэшхо иI. Ащ ишIуагъэкIэ шIэныгъакIэхэр зэтэгъэгъотых, ахэр тапэкIэ къызыфэдгъэфедэщтых, — еIо Галина Волошинам. Любовь Шулятскаяр станицэу Келермесскэм иветеран обществэ ипащ. БэшIагъэ компьютерыр зэригъэшIэнэу, Iоф ри­шIэнэу зыфэягъэр. Мыщ фэдэ егъэджэнхэр зэрэзэхащагъэр зызэхехым игуапэ хъугъэ. КомпьютерымкIэ текстхэр хиутынхэу зигъэсагъ, джы Интернетыр, социальнэ нэкIубгъохэр нахь ыгъэфедэщтых. Итучан ыгъэлэ­жьэнымкIэ шIэныгъэу мыщ щы­зэригъэгъотыхэрэр къызэрэ­шъхьэпэщтхэр игуапэу къыхегъэщы. ДЕЛЭКЪО Анет. Сурэтхэр: А.Лаутеншлегер.