Iэрыфэгъу къэлэ щыIакIэр
[caption id="attachment_146478" align="aligncenter" width="800"] Фото: Алексей Гусев[/caption]
ЦIыфхэм зызщагъэпсэфыщт ыкIи яуахътэ зыщагъэкIощт чIыпIэ зэтегъэпсыхьагъэхэр шIыгъэнхэр ары «Iэрыфэгъу къэлэ щыIакIэ гъэпсыгъэныр» зыфиIорэ федеральнэ проектым пшъэрылъ шъхьаIэу иIэр.УФ-м и Президентэу Владимир Путиныр кIэщакIо зыфэхъугъэ лъэпкъ проектхэм ащыщэу «ПсэупIэр ыкIи къэлэ щыIакIэр» зыфиIорэм ипхырыщын пае ар аштагъ. Адыгеим проектыр илъэс пчъагъэ хъугъэу щыпхыращы. АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, ар зыщырахьыжьэгъэ 2017-м къыщыублагъэу 2023-м ыкIэм нэс пштэмэ, фэтэрыбэу зэхэт унэхэм ящагу 216-рэ республикэм щагъэкIэжьыгъ, общественнэ чIыпIи 106-рэ зэтырагъэпсыхьагъ е кIэу ашIыгъ. ПстэумкIи сомэ миллиарди 2,5-м ехъу ахэм апэIухьагъ. Джы мы къихьэгъэ 2024-рэ илъэсым общественнэ чIыпIи 7 ыкIи щагу 31-рэ агъэкIэжьынэу гухэлъ яI. Ахэм анэмыкIэу къэлэ цIыкIухэм я Урысые зэнэкъокъоу проектым къыдыхэлъытагъэм ишIуагъэкIэ къалэу Мыекъуапэ имэз-парк чIыпIэу «Мэздахэмрэ» Адыгэкъалэ ипроспектэу Лениным ыцIэ зыхьырэм тет паркымрэ зэтырагъэпсыхьащтых. Ахэм сомэ миллион 503,3-рэ атефэщт. Ащ щыщэу сомэ миллион 298-м ехъур федеральнэ ахъщ. Адыгеим икъэлэ шъхьаIэ иурамэу я 3-рэ Интернационалым тет унэхэм ащыщ игъэкIэжьын рагъэжьагъ. Ащ кIэлэцIыкIухэм апае джэгупIэ щагъэпсыщт, лъэсрыкIо ыкIи автомобиль гъогоу зэпызычыхэрэм ателъыр зэблахъущт, тIысыпIэхэр, хэкIитэкъупIэхэр, къэзыгъэнэфырэ пкъыгъохэр щагъэуцущтых, чъыгхэр къаупкIэрыпхъухьащтых, къэгъагъэхэр къызщыкIыхэрэр зэрагъэфэщтых. Къэлэ администрацием къызэрэщаIуагъэмкIэ, сомэ миллиони 4-м ехъу ахэм апэIухьащт. Мыекъуапэ иурамэу Коммунаровым тет унэу N 147-м ищагуи етIупщыгъэу зэтырагъэпсыхьэ. Охътэ благъэм ащ щыпсэухэрэм «тищагу Iэрыфэгъу хъугъэ» аIонэу амал яIэ хъущт. Сомэ миллиони 7,2-рэ ащ щызэшIуахыщтхэм апай агъэнэфагъ. Урамэу Димитровым ыцIэ зыхьырэм тет унэхэу N N 1-м, 3-м ящагухэм ягъэкIэжьын сомэ миллион 11-м ехъу тефэщт. IофшIэнхэр щырагъэжьагъэх Адыгэкъалэ ипроспектэу Лениным ыцIэ зыхьырэм тет унэхэм ащыщхэм ящагуи. Ащи къэлэ шъхьаIэм ищагухэм ащагъэнэфэгъэ IофшIэн дэдэхэр ары щызэшIуахыщтхэр. ПстэумкIи сомэ миллиони 2,9-рэ атефэщт. Мэлылъфэгъу мазэм и 1-м шIомыкIэу аухын гухэлъ яI. Лъэпкъ проектэу «ПсэупIэр ыкIи къэлэ щыIакIэр» зыфиIорэм ипхырыщын пае республикэм щаштагъ проектэу «Псы къабзэр». УФ-м и Президент иунашъоу лъэпкъ проектхэм афэгъэхьыгъэм ипIалъэ диштэу ар Адыгеим щыпхыращы. Ащ къыдыхэлъытагъэу 2023-рэ илъэсым псэолъэ 13 республикэм щагъэкIэжьыгъ. Ахэм зэкIэмкIи сомэ миллион 308-м ехъу атефагъ. АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, 2024-рэ илъэсым псыкъычIэщыпIи 6 республикэм щашIыщт е щагъэкIэжьыщт. ХЪУТ Нэфсэт.