АР-м и Къэралыгъо Совет — Хасэм я XXXII-рэ зэхэсыгъоу тыгъуасэ иIагъэр къихьэгъэ 2024-рэ илъэсымкIэ апэрагъ.

Ащ хэлэжьагъэх АР-м и ЛIышъхьэу КъумпIыл Мурат, министрэхэм я Кабинет хэтхэр, федеральнэ ыкIи шъолъыр къулыкъухэм япащэхэр, нэмыкIхэр. Iоф­тхьабзэр зэрищагъ Парламентым и Тхьаматэу Владимир Нарожнэм. Республикэ хэбзэгъэуцугъэхэр федеральнэхэм адиштэнхэм фэшI къэралыгъо гражданскэ къулыкъум, кIэлэцIыкIу ыпIу­нэу зыштэгъэ унагъохэм мазэ къэс ахъщэу афэкIощтым, социальнэ IэпыIэгъум, физическэ культурэм ыкIи спортым, чIыпIэ зыгъэIорышIэжьыпIэхэм, зыныбжь икъугъэ хэушъхьафыкIыгъэ цIыф купхэм алъыплъэхэрэм, цIыфхэм яфитыныгъэхэр къэухъумэгъэнхэмкIэ Уполномоченнэм, нэмыкIхэм афэгъэхьыгъэ законопроектхэр, хэбзэгъэуцугъэхэр аштагъэх. Джащ фэдэу АР-м и Конституцие гъэтэрэзыжьынхэр фэшIыгъэнхэм фэгъэ­хьыгъэ хэбзэгъэуцугъэу АР-м и ЛIышъхьэ кIэщакIо зыфэхъугъэм дырагъэ­штагъ, Къэралыгъо Советым — Хасэм и Регламент зэхъокIыныгъэхэр фашIыгъэх. УФ-м инэмыкI шъолъырхэм яхэбзэ­ихъу­хьэ къулыкъухэр кIэщакIо зыфэхъу­гъэхэми депутатхэр атегущыIагъэх, адырагъэштагъ. ПстэумкIи упчIэ 40 повесткэм итыгъ. АР-м и ЛIышъхьэу КъумпIыл Мурат законопроектэу зыхэплъагъэхэм ащыщ­хэм къатегущыIэзэ, хэушъхьафыкIыгъэ цIыф купхэм IэпыIэгъу ятыгъэнымкIэ Iофэу ашIэрэм мэхьанэ ин зэриIэр къыхигъэ­щыгъ. Ныгъом ыкIи кIэлэцIыкIу­гъом якъэухъумэн, сабыибэ зэрыс унагъохэм IэпыIэгъу афэхъугъэным лъэшэу анаIэ тет. КIэлэцIыкIу ибэхэм псэупIэхэр ягъэгъотыгъэнхэм блэкIыгъэ илъэсым изакъоу сомэ миллиони 150-рэ респуб­ликэм пэIуигъэхьагъ. ХэушъхьафыкIыгъэ дзэ операцием хэлажьэхэрэмрэ ахэм яунагъохэмрэ анаIэ атырагъэтыныр пшъэрылъ шъхьа­Iэхэм ащыщ. — Зыпари къыхэмынэу ахэм зэкIэми ящыкIэгъэ IэпыIэгъур ягъэгъотыгъэн фае. Муниципальнэ образованиехэр къызытэкIухьэхэм, хэушъхьафыкIыгъэ дзэ операцием хэла­жьэхэрэм яунагъохэм тащы­Iагъ. IэпыIэгъу зищыкIагъэхэр зэрахэтхэр джащыгъум къэлъэгъуагъ. ТынаIэ темытэу зи къа­нэ хъущтэп. Мы IофшIэным депутатхэри къыхэлэжьэнхэ фае, — къыIуагъ КъумпIыл Мурат. ЦIыфхэм ящыIакIэ нахьышIу шIыгъэным пае гъэцэкIэкIо ыкIи хэбзэихъухьэ къулыкъухэр зэдэлэжьэнхэм мэхьанэ­шхо зэриIэри ЛIышъхьэм къыхигъэщыгъ. — Iофыгъоу ахэм къаIэтыхэ­рэм ащыщыбэ псэупIэ койхэм ащадагъэзыжьынхэ алъэкIыщт. Арышъ, мы лъэныкъомкIэ IофшIэнхэр нахь гъэлъэшыгъэнхэ фае. Социальнэ пшъэрылъэу тиIэр зэкIэ дгъэцакIэзэ, рес­публикэм исхэм Iэрыфэгъу щыIакIэ яIэным тыдэлажьэ. Псэолъэ зэфэшъхьафыбэу тшIыгъэм ахэм шIуагъэ къафихьыщт, — къыIуагъ АР-м ипащэ. ХЪУТ Нэфсэт.