«Илъэс 25-рэ хэгъэхъуагъэу ныбжь хэкIо­тагъэ зиIэхэм апай» зыфиIорэ фестивалыр мэзаем и 17-м Адыгэ Республикэм и Лъэпкъ музей щыкIуагъ.АНО-у «Физическэ культу­рэмрэ спортымрэ хэхъоныгъэ ягъэшIыгъэнымкIэ Гупчэм» ипро­ектэу «Активные люди 3» зыцIэм мы Iофтхьабзэр хэхьэ. Республикэ бюджетым къыхагъэкIыгъэ грантым ишIуагъэкIэ проектыр агъэцэкIагъ. Iофтхьабзэр рагъэжьэным ыпэкIэ зэхахьэм ихьакIэхэм Лъэпкъ музеим иэкспозициехэр арагъэлъэгъугъ. «Нэжъ-Iужъ пэпчъ иIофхэм язытет нахьышIу хъуным, щыIэныгъэм чанэу ахэр хэтынхэм афытегъэпсыхьэгъэ Iофтхьа­бзэхэр проектым къыщыдэлъытагъэх. Ныбжь хэкIотагъэ зи­Iэхэм тыкъэзыуцухьэрэ дунаим идэхагъэ алъэгъуныр, япсау­ныгъэ къаухъумэныр аныбжь емы­лъытыгъэу щыIэкIэ гъэшIэгъон зэрэбгъэпсын плъэкIыщтыр алъыдгъэIэсыныр, ахэм къафэтщэнхэр ары фестивалым пшъэ­рылъ шъхьаIэу иIэр», — къы­Iуагъ АНО-у «ЦСФКИС» зыфи­Iорэм именеджер шъхьаIэу Марина Мельник. Зэхахьэр къызэIуихыгъ «Театр трех дорог» зыфиIорэ купым икъэгъэлъэгъон гъэшIэгъонкIэ. КъекIолIэгъэ цIыфхэм агу рихьырэ лъэныкъор къыхахызэ, куп-купэу Iофтхьабзэу зэхащагъэхэр зыщыкIохэрэ залхэм ачIэхьагъэх. Лекцие гъэшIэгъонхэу атлетикэ псынкIэмкIэ заслуженнэ тренерэу Татьянэ Пищальниковам, АР-м изаслуженнэ юристэу ЯхъулIэ Тэмарэ, предпринимателэу Елена Лаврентьевам къа­шIыгъэхэр щыIэныгъэм илъэныкъо зэфэшъхьафхэм нэжъ-­Iужъхэм чIыпIэ щаубытын зэралъэкIыщтым фэгъэхьыгъагъэх. Ментальнэ арифметикэмкIэ тренерэу Ирина Волинам — «Хьисапым сыд фэдэрэ ныб­жьи фэкъулай»; психотерапевтэу Галина Яроваям — «Бзылъфыгъэм ижъогъо бын» зыфиIорэ узIэпызыщэрэ зэдэгущыIэгъухэр зэхащагъэх. Джащ фэдэу спортымкIэ зэдэгущыIэгъухэр рагъэкIокIыгъэх. Мые­къопэ къэралыгъо технологическэ университетым прикладной информатикэмкIэ икафедрэ идо­центэу, техническэ шIэныгъэхэмкIэ кандидатэу Цундышкэ Вячеслав «Кибербезопасность и искусственный интеллект» зыфиIорэ лекцием нэжъ-­Iужъхэм къафеджагъ. «IэпэIасэм идесэхэр» зыфиIорэм Жанна Шевченкэм мыжъо цIыкIухэмкIэ сурэтхэр чэтэным тыраригъэпкIагъэх. АIэкIэ ашIыгъэ пкъыгъохэр хэлэжьагъэхэм гукъэкIыжьэу зы­даштэжьыгъэх. ЦIыфым обществэм чIыпIэу щиубытырэр гъэпытэгъэным фэIорышIэрэ Iофтхьэбзэ зэфэшъхьафыбэ фестивалым щызэхащагъ, физическэ ыкIи психическэ зэфыщытыкIэм тегущыIагъэх. Нэжъ-Iужъхэм финанс фэIо-фа­шIэхэр тэрэзэу агъэфедэнхэм­кIэ IэпыIэгъу афэхъущт зэ­дэ­гущыIэгъур бэмэ ашIогъэшIэгъо­ныгъ. БзэджашIэхэм амыгъэпцIэнхэмкIэ анахьэу анаIэ зытырагъэтын фэе лъэныкъохэр къафаIотагъ. Банковскэ картэр зыфэдэр, бзэджашIэхэм нахьыбэрэмкIэ агъэфедэрэ шIыкIэхэр, ахэм зызэращыуухъумэщтыр зэхэщакIохэм къаIотагъ. Зыныбжь хэкIотагъэхэр зэ­рылэжьэнхэ алъэкIыщт сэнэхьатхэм яермэлыкъ, волонтерхэм зэрахьэрэ Iофтхьабзэхэм фестивалым къекIолIагъэхэр нэ­Iуа­сэ афэхъугъэх. Iофтхьабзэр кон­церткIэ аухыгъ. Сурэтхэр: А. Лаутеншлегер.