Проектэу «Адыгабзэм итарихъ»
Тэщ фэдэ лъэпкъ цIыкIухэм яныдэлъфыбзэ мыкIодыжьыным, ащ хэхъоныгъэ ышIыным мы мафэм ихэгъэунэфыкIын фытегъэпсыхьагъ.
Адыгеир илъэси 100 зэрэхъугъэм фэгъэхьыгъэу АР-м и Лъэпкъ тхылъеджапIэрэ Урысые Лъэпкъ электроннэ тхылъеджапIэмрэ пIэлъэ кIыхьэм телъытэгъэ проектэу «Адыгабзэм итарихъ» зыфиIорэр рахъухьагъ.
Адыгеим и Лъэпкъ тхылъеджапIэ оцифровкэмкIэ иотдел ипащэу Чэтыжъ Людмилэ мы проектым дэлажьэ. Ащ къыдыхэлъытэгъэ Iофтхьабзэхэм ягъэцэкIэн зэрэлъыкIуатэрэм ащ тыщигъэгъозагъ.
— Проектэу «Адыгабзэм итарихъ» зыфиIорэм тыхэлэжьэнэу 2020-рэ илъэсым Урысые Лъэпкъ электроннэ тхылъеджапIэм тыригъэблэгъагъ. Цифрэ шIыкIэм тетэу бзэм итарихъ фэгъэхьыгъэ къэбархэр сайтым идгъэхьанхэу зэдэтштагъ. Ащ ишIуагъэкIэ интернетым иамалхэмкIэ фэе пстэури тхылъхэм яджэшъунхэ алъэкIыщт. Мыщ дэжьым пэрыохъу къытфэхъурэр тхылъхэр интернетым идгъэхьанхэм ыпэкIэ ахэм яавторхэм фитыныгъэ къытатын зэрэфаер ары. Мы проектым ипшъэрылъ шъхьаIэр бзэр адыгэ лъэпкъымкIэ мылъку инэу зэрэщытыр цIыфхэм алъыдгъэIэсыныр ары. 1925-рэ илъэсым щегъэжьагъэу непэрэ мафэм нэс къыдагъэкIыгъэ тхылъхэр проектым хэдгъэхьагъэх. ШIоигъоныгъэ зиIэхэм ахэр агъэфедэнхэ алъэкIыщт. Гъэсэныгъэ уимыIэу лъэхъаным диштэу улъыкIотэн плъэкIыщтэп, зыбзэ зыIэкIэмылъ лъэпкъыр кIодыжьыщт, — еIо Чэтыжъ Людмилэ.
Тиадыгабзэ тыфэсакъын фае, ар тыухъумэу, дгъашIоу тIэтымэ, къызэтенэщт. Ащ дакIоу еджапIэхэм нахь куоу ар ащызэрагъэшIэным мэхьанэшхо иI.
— ТапэкIэ проектым нахь зедгъэушъомбгъущт. Непэрэ адыгэ тхакIохэм яIофшIагъэхэр цифрэ шIыкIэм едгъэкIунхэу тэгъэнафэ. Ащ фэдэ фитыныгъэ авторхэм
къытатымэ, тиIофшIэн лъыдгъэкIотэщт. Цуекъо Юныс итхылъ 23-мэ янэкIубгъохэр интернетым идгъэхьагъэх. Джырэ уахътэм МэщбэшIэ Исхьакъ илъэс 95-рэ зэрэхъурэм фэгъэхьыгъэу иIофшIэнхэр цифрэ шIыкIэм етэгъэкIух, — къытфиIотагъ Людмилэ.
Лъэпкъ тхылъеджапIэм ыгъэцэкIэрэ проектым ишIуагъэкIэ тиадыгабзэ хэхъоныгъэ ышIыщт, ар пстэуми анахь шъхьаI.