Тянэхэм афэсэтхы КъэнэтӀэхэсхэм нэпсыр къячъэхышъ, Лъагэу зыкъаӀэтышъ, къэхалъэм къыдэппъых. Гукъанэу яIэр нэкIэ къаӀуатэшъ, ЗыкъаӀэтыгъэшъ, къуаджэм къыдаплъэх. Гупшысэ джанэм кӀышъор къыфызэу, Мэкъэ гухэкӀыр сыгу сэ къыщэшхэ. Бэн шIуцIэ къогъур ащ яуцупӀэу, Якъин-хьазаби къыраIотыкIы. Тынасыпынчъэу шӀулъэгъур тыухишъ, Шъхьэзэкъо гъогум тытеуцуагъ. Гупсэ тимыӀэжьэу гу закъор къекIокIышъ, ГъашӀэм итыркъоу кӀышъом къытенагъ. ЦӀыфыр акъылкӀэ къиным егъасэшъ, Гупшысэ инхэр хышхоу къегъэущы. Сэтэнэе гуащэу шъуищытхъу къекIокIышъ, ШIункIым тыхэтми, ащ тэ тыIокIэ. Мафэрэ тыгъэу ташъхьагъ шъущепсы, НэбзыйкӀэ чӀылъэр шъо шъогъэфабэ. Чэщырэ мазэу ташъхьагъ шъущэнэфы, Нэфыпсыр дышъэпсэу шъуибэн къытырекӀэ. Джэнэт осэпсыр пчэдыжьрэ къышъуфехышъ, ШъугукӀэ шъуигуапэу ащ шъуегъэшъокӀы. Ошъогу шхъуантӀэр шъо шъуитехъонышъ, Гъэбэжъу чъыем шъо шъухещыжьы. ЧIыпIэ зэжъу тифэмэ, ТыгукIэ тышъоджэ. Къиным тыхафэмэ, НэпсыкӀэ тышъулъэджэ. ТыблэкIы къэсми гукIэ тыкъаджэ, Шъутымылъэгъуми, тынэгу шъукӀэт. Нартхэм ямашӀо ренэу къышъуфепсэу, Нарт Саусырыкъоу шъуашъхьагъ ерэт. Ным нахь лъапiэу хэта щыiэр? Быдзыщэ фабэр нэхъоеу къакIошъ, ЗыбгъэшъокӀыгъэу къэгъагъэу пхахъо. Iэшъэбэ фыжьхэр дахэу оIэтышъ, НэIэшIу гушIуагъокIэ ным упэгъокӀы. Охътэ мамырым сабыигъор тефагъэшъ, Унэу узэрысыр чэфкӀэ огъэнэфы. ГукIэгъур зэрызэу цIыфышIу хэгъэгушъ, Ыбгъэшъо фабэ мазэу ущэнэфы. Ным ыIэшъхьитIу къазыц шъабэшъ, Къыпфэсакъыпэу къыпкӀелъхьэ кӀэлъыныр. НэгушӀо бэрэчэтэу ынапэ укIаплъэшъ, ШӀэхэу огъэтӀылъы лъэкъо цIыкIуитIур. Ным ыбгъэ шъабэ фэбагъэр къыхэкӀышъ, Гупсэфыр нэбзыйкӀэ о хэогъуатэ. ГушӀогъо кIуачIэм уянэ зэрищэзэ, Емызэщыжьэу сакъэу къыплъэплъэ. Орэд дахэм о уригъашӀозэ, Бгъэшъо фабэм ущэчъыежьы. КӀымэфэ чъыӀэм унэм уихьажьмэ, Джэныкъо машӀор тхъагъоу щытынба? Уянэ имысыгъэу унэм къихьажьмэ, Джэнэт машIокIэ унэр фэбэнба? Ным ичӀыфэ хэта зытемылъыр? Ным ибыдзыщэ хэта емышъуагъэр? Ным нахь лъапӀэу хэта о уиIэр? Хэт ищэчалъэкӀэ ар о пщэчына? Дунэе дахэр шiукiэ щэрэi! ГумэкIыгъо зиIэр гумыпсэф мэхъушъ, Зэщтегъэу лъыхъоу унэр къекIухьэ. Къихьэрэ чэщыр мазэм къызэIуехышъ, Ом ипачъыхьэу чIылъэр къеплъыхьэ. Зэпэжъыужьэу уашъор зэкIанэшъ, Жъуагъохэм янэфкIэ гъогум тырэгъуазэ. ЧIылъэмрэ уашъомрэ зэщыщ мэхъужьышъ, Мэзэ нысакIэм тIури къыфэнэжьы. Тыдэ бгъэзагъэми налмэс-налкъутэшъ, Нэплъэгъу нэбзыим огум тырещэ. Жъуагъохэм яшIэткIэ огур къэтэкIухьэшъ, Зы лъэпсэ пытэу зэкIэ тыкъэнэжьы. СигушIуагъо сфимыкъоу ом сиIэбагъэшъ, Анахь жъогъо дахэр пшъашъэу къисэхы. Бгъашъом зэрэдафэу фэбагъэр къысетышъ, Шъошэ шIыгъакIэу шIулъэгъур къысщелъэ. Къисхыгъэр сшIомакIэу джыри сэIабэшъ, ЩыкIагъэр зэкIэ сэ къисэхыжьы. ПчыкIэм нахь псынкIэу огур сэбгынэшъ, Чэфыгъо-гушIуагъор бэрэчэтэу сэгощы. ТIысыпIэр гупшысапIэу чэщым хэсэхышъ, Сымылъэгъурэ пшъашъэм орэд къысфеIо. Къэгъагъхэр зэкIэ къэущыжьыгъэшъ, Амэкъэ дахи тыдэкIи къыщэIу. Зы нэбгырэм итхъагъо зэкIэ титхъагъоу, ЗэкIэми ятхъагъо зы нэбгырэм итхъагъоу Тхьэркъо бгъэгуфхэм орэд къарэIу! Дунэе дахэр шIукIэ щэрэI! Iэшъынэ Юныс. къу. Гъобэкъуай.