Мыекъуапэ икIэлэеджакIохэм я Спартакиадэ шахмат­хэмкIэ командэхэм язэнэкъокъоу къыдыхэлъытагъэхэр аухыгъэх. ЕджапIэхэм ачIэсхэм спорт лъэпкъи 10-кIэ заушэтыщт, шах­матхэр ятфэнэрэх. Мэзаем и 9-м щегъэжьагъэу и 16-м нэс республикэ шахмат клубым щыкIогъэ зэнэ­къокъухэм цIыфыбэ яплъыгъ. Командэ пэпчъ нэбгыриплI хэтыгъ. Зэфэхьысыжьхэм къызэрагъэлъэгъуагъэмкIэ, апэрэ купым текIоныгъэр къыщыдихыгъ гурыт еджапIэу N 17-м, ятIонэрэ ыкIи ящэнэрэ чIыпIэхэр къафагъэшъошагъэх лицееу N 19-мрэ Мыекъопэ гимназиеу N 22-мрэ. ЯтIонэрэ купым анахь щылъэшыгъ гъэсэныгъэм игупчэу N 18-р, хагъэунэфыкIырэ чIыпIэхэр къыдахыгъэх гурыт еджапIэу N 28-м ыкIи Мыекъопэ гимназиеу N 5-м ялIыкIохэм. Спартакиадэм ипрограммэ къыдыхэлъытагъэу джы кIэлэеджакIохэр баскетболымкIэ зэнэкъокъущтых.