Урысыем ичемпионат и Апшъэрэ лигэ щешIэрэ Адыгеим икомандэу «Динамо-МГТУ-м» мы мафэхэм зэIукIэгъуитIу иIагъ. АхэмкIэ зэнэкъокъум иапэрэ едзыгъо ыухыгъ. Республикэм ибаскетболистхэр Чувашиер къэзыгъэлъэгъорэ «Чебоксарские ястребы» зыфиIорэм тIогъогогъо IукIагъэх. ЯтIонэрэ ешIэгъур тикомандэ къы­хьыгъ, пчъагъэр — 80:72. Зэнэкъокъум иапэрэ едзыгъо изэфэхьысыжьхэм зафэбгъазэмэ, «Динамо-МГТУ-м» ешIэгъу 24-рэ иIагъ, ахэм ащыщэу 10-р ары ныIэп къыхьыгъэр ыкIи я 5-рэ чIыпIэр къыдихыгъ. Пэрытныгъэр зыIыгъыр «Металлург» (Магнитогорск). Джы командэхэм чемпио­натым иятIонэрэ уцугъо къыды­хэлъытэгъэ зэIукIэгъухэр къапыщылъых. ЗэхэщакIохэм зэрагъэнэфагъэмкIэ, ахэр купитIоу гощыгъэщтых: апэрэ чIыпIищыр зыIыгъхэр зэдешIэщтых, джащ фэдэу я 4 — 7-м щытхэри шъхьа­фэу зэIукIэщтых. Командэхэр зыдэщыт чIыпIэхэр ыкIи очко пчъагъэу рагъэкъугъэр: 1. «Металлург» (Магнитогорск) — 44. 2. ЦСП-Химки (Химки) — 40. 3. «Динамо» (Грознэр) — 39. 4. «Чебоксарские ястребы» (Чебоксары) — 35. 5. «Динамо-МГТУ» (Мые­къуапэ) — 34. 6. «Нефтехимик» (Тобольск) — 32. 7. «Южный слон» (Ставрополь) — 28.