[caption id="attachment_146385" align="aligncenter" width="800"] Алексей Гусев[/caption]

Тыгъуасэ Мыекъопэ къэ­ралыгъо технологическэ университетым щыкIогъэ конференцием мы еджа­пIэм иректор щыхадзыгъ. ЫпэкIэ агъэнэфэгъэ лIыкIуи 111-мэ ащыщэу хэдзынхэм 105-рэ ахэлэжьагъ, ахэм амакъэ атыгъ. Конференцием хэлэжьагъэх Урысыем и ЛIыхъужъэу, Адыгэ Республикэм и Къэралыгъо Совет — Хасэм идепутатэу Цэй Эдуард, АР-м финансхэмкIэ иминистрэу Виктор Орловыр, МКъТУ-м ипрезидентэу ТхьакIущынэ Аслъан, мы апшъэрэ еджа­пIэм иIофышIэхэр. УФ-м шIэныгъэмкIэ ыкIи апшъэрэ гъэсэныгъэмкIэ и Министерствэ ыгъэ­нэфэгъэ графикымкIэ ректорым ихэ­дзынхэр зэхащагъ. Ректор хъунымкIэ кандидатищымэ зыкъагъэлъэгъогъагъ. Ахэр: МКъТУ-м иректорэу, экономикэ шIэныгъэхэмкIэ докторэу Къуижъ Саидэ, апшъэрэ еджапIэм итехнологическэ факультет идеканэу, техническэ шIэныгъэхэмкIэ докторэу Шъхьэлэхъо Анзаур ыкIи университетым иеджэпIэ-­методи­ческэ гъэIорышIапIэ ипащэу, экономикэ шIэныгъэхэмкIэ кандидатэу Наталья Чудесовар. Ау конференциер зэхащэнымкIэ зы мафэ къэнагъэу Наталья Чудесовам икандидатурэ рихыжьыгъ. Мыекъопэ къэралыгъо технологическэ университетым иректор ихэдзынхэм афэгъэзэгъэ комиссием итхьаматэу Татьяна Овсянниковам Iофтхьабзэр зэрищагъ. Конференцием къыдыхэлъытагъэу, апшъэрэ еджапIэр къызызэIуахыгъэр илъэс 30 зэрэхъугъэм фэгъэхьыгъэу гъэхъэгъэшIухэр зышIыгъэ кIэлэ­егъа­джэхэм АР-м и Къэралыгъо Совет — Хасэм ищытхъу ыкIи ирэзэныгъэ тхылъхэр аратыжьыгъэх. — Непэ МКъТУ-м нэбгырэ мин 11-м ехъу щеджэ. Мы еджэпIэ закъор ары респуб­ликэм пае псэолъэшIынымкIэ, геодезиемкIэ, транспортымкIэ, мэз хъызмэтымкIэ, мэкъу-мэщымкIэ, псауныгъэм икъэ­ухъумэнкIэ ыкIи нэмыкI лъэныкъохэмкIэ специалистхэр зы­гъэхьазырхэрэр. (ИкIэух). Ректорым ихэдзынхэм ахэлэжьэнэу зыкъэзы­гъэлъэгъогъэ Къуижъ Саидэ икандидатурэ десэгъаштэ. Университетым игъэхъагъэхэм къащымыкIэу ыпэкIэ лъыкIотэщт, — къы­Iуагъ ТхьакIущынэ Аслъан. IофшIэнымкIэ чанэу зыкъэзыгъэлъэгъогъэ Къуижъ Саидэ икандидатурэ къыхахымэ нахь тэрэзэу къэгущыIэгъэ пстэуми алъытагъ. Нэужым хэдзынхэм ахэлэ­жьэрэ нэбгыритIур ашIэрэ Iофым, программэу агъэцакIэ­хэрэм къатегущыIагъэх. Шъхьэ­лэхъо Анзаур С. Къуижъым зэрэдыригъэштэщтыр къыIуагъ, нэмыкIхэми амакъэ ащ фатынэу къяджагъ. Мэкъэтыныр шапхъэхэм адиштэу кIуагъэ. ЛъытэкIо ко­мис­сием ипащэу БрантI Мурат хэдзынхэм зэфэхьысыжьэу афэхъугъэхэр къыIуагъ. Къуижъ Саидэ нэбгыри 102-мэ дырагъэ­штагъ ыкIи ар ректорэу ха­дзыжьыгъ. Къуижъ Саидэ Мыекъуапэ къыщыхъугъ. 1988-рэ илъэсым гурыт еджапIэу N 3-р дэгъу дэ­дэу, нэужым Адыгэ къэралыгъо университетыр къыухыгъэх. Апшъэрэ еджапIэм кафедрэм ипащэ иIэпыIэгъоу щыригъажьи ректорым нэсыгъ. Экономическэ шIэныгъэмкIэ доктор, физикэ- хьисап шIэныгъэхэмкIэ кандидат, хьисапымкIэ, физикэмкIэ ыкIи системнэ зэхэфынымкIэ кафедрэм ипрофессор. 2013-рэ илъэсым къыщегъэжьагъэу непэрэ мафэм нэс Мыекъопэ къэралыгъо технологическэ университетым иректор. ИлъэсипшIым ехъугъ ипшъэрылъхэр зигъэцакIэхэрэр. АР-м и ЛIышъхьэу КъумпIыл Мурат Мыекъопэ къэралыгъо технологическэ университетым иректорэу зэрэхадзыжьыгъэмкIэ Къуижъ Саидэ къыфэгу­шIуагъ. — Хэдзынхэм язэфэхьысыжьхэм къагъэлъагъо Къуижъ Саидэ ипшъэ­рылъхэр зэрифэшъуашэу зэригъэцакIэхэрэр ыкIи иIофшIэгъухэм цыхьэ къызэрэфашIырэр. Мы аужырэ илъэсхэм ап­шъэ­рэ еджапIэм хэхъоныгъэу ышIыхэрэми ар къаушыхьаты. МКъТУ-м гъэсэныгъэм ылъэны­къокIэ гъэхъэгъэшхохэр иIэх, аужырэ шапхъэхэм адиштэрэ шIыкIэхэр щагъэфедэх. Адыгеир IофышIэхэм ащымыкIэным иIахьышIу хэлъ, ащ къыдыхэлъытагъэу мэкъумэщым, зекIоным, псэолъэшIыным, медицинэм яIофы- шIэ­хэр егъэхьазырых. Пшъэ­рылъэу тиIэхэр щыIэныгъэм щыпхырытщынхэм фэшI специалист дэгъухэр, рес­публикэм хэхъоныгъэ езыгъэшIыщт инновационнэ проектхэр джыри нахьыбэу тищыкIагъэх, — къыIуагъ КъумпIыл Мурат. Мыекъопэ къэралыгъо технологическэ университетым мы пшъэрылъхэр ыгъэцэкIэнхэмкIэ ищыкIагъэр зэкIэ зэрэIэкIэлъыр республикэм ипащэ къыхигъэщыгъ. Ректорэу хадзыжьыгъэ Къуижъ Саидэ зипэщэ апшъэрэ еджапIэм хэхъоныгъэхэр зэри­шIыщтхэм, ипшъэрылъ шъхьа­Iэхэр зэрифэшъуашэу зэригъэцэкIэщтхэм ицыхьэ зэрателъыр КъумпIыл Мурат къыIуагъ. ДЕЛЭКЪО Анет.