Урысые общественнэ организациеу «НыбжьыкIэхэм я Урысые Союз» зыфиIорэм ишъолъыр къутамэ мэзаем и 16-м къыщегъэжьагъэу и 18-м нэс Iоф­тхьабзэу «Школа актива «Оштен»» зыфиIорэр зэхищагъ. Апшъэ­рэ ыкIи гурыт сэнэхьат зэзыгъэгъотырэ студент 300 фэдиз ащ хэлэжьагъ. Лъэныкъуи 7-кIэ гощыгъэу ахэм яшIэныгъэхэм ахагъэхъуагъ. МэфэкI шIыкIэм тетэу Адыгэ къэралыгъо университетым Iофтхьабзэр къы­щызэIуахыгъ. ШIуфэс гущыIэхэр къаIуа­гъэх Адыгэ къэралыгъо университетым ныбжьыкIэ политикэмкIэ ыкIи социальнэ лъэныкъомкIэ ипроректорэу ШъхьакIэмыкъо Рустам, Урысыем IофшIэнымкIэ и ЛIыхъужъэу, Адыгэ, Къэбэртэе-Бэлъкъар, Къэрэщэе-Щэрджэс республикэхэм ялъэпкъ тхакIоу МэщбэшIэ Исхьакъ, «НыбжьыкIэхэм я Урысые Союз» ишъо­лъыр къутамэ ипащэу Мыгу Бислъан. Нэужым ныбжьыкIэхэм егъэджэнхэр аублагъэх. Купи 10-у гощыгъэхэу ныбжьыкIэхэм яшIэныгъэхэм ахагъэхъуагъ, ыпэрапшIэу ахэр нэIуасэ зэфэхъугъэх, шъхьадж нахь зыфэщэгъэ лъэныкъом елъытыгъэу егъэ­джэнхэр аублагъэх. Мэфищым къыкIоцI Союзым ишъолъыр къутамэ Iофыгъоу зэшIуихыхэрэр, студент зыгъэIоры­шIэ­жьыным пшъэрылъэу иIэхэр, проект­хэр зэрэбгъэпсыщтхэр, медиа лъэныкъом­кIэ хэхъоныгъэхэр зэрэпшIыщтхэр ыкIи нэмыкIхэр къафаIотагъэх. Iофтхьабзэм къыдыхэлъытагъэу ныбжьыкIэхэм мас­тер-классхэр, зэнэкъокъугъэх афызэхащагъэх. ЯтIонэрэ мафэм проектым ипрограммнэ пащэу Павел Дорошенкэр лъэныкъоу «Твой ход» зыфиIорэм фэгъэхьыгъэу гущыIэгъу афэхъугъ. Мыгу Бислъан ныбжьыкIэ организацием зэхищэрэ IофшIэныр къафиIотагъ. Шъолъыр еджапIэу «Ошъутен» зыфиIорэр гъэсэныгъэ проект. Адыгэ Республикэм истудентхэм яшIэныгъэ зыщыхагъэхъорэ чIыпIэу ар щыт, творческэ, социальнэ лъэныкъомкIэ ныбжьыкIэхэм хэхъоныгъэхэр ашIынхэр ары пшъэрылъ шъхьаIэу зэхэщакIохэм зыфагъэуцужьырэр. МэфэкI шIыкIэм тетэу Iофтхьабзэр зэфашIыжьыгъ, анахь къахэщыгъэхэм шIухьафтынхэр аратыгъэх. ДЕЛЭКЪО Анет.