Адыгеим исурэтышIхэм я Союз зызэхащагъэр илъэс 45-рэ зэрэхъугъэм фэгъэхьыгъэ къэ­гъэ­лъэ­гъонэу «Созидая гармонию красок» зыфиIорэр АР-м и Лъэпкъ тхылъеджапIэ къыщызэ­Iуахыгъ. ТхылъеджапIэм краеведениемрэ литературэмрэкIэ иотдел иIофышIэхэм игъоу алъэгъуи, мыр агъэпсыгъ. Мыщ Адыгеим исурэтышIхэм ятворчествэ, ящыIэныгъэ фэгъэхьыгъэ каталогхэр, тхылъ инхэр, гъэзет хэутыгъэ тхыгъэхэу ахэм афэгъэхьыгъэхэр — зэкIэ АР-м исурэтышIхэм я Союз илъэс 45-у зылажьэрэм, шъхьа­фитэу, нэплъэгъум къыубытэу, гум зэхишIэрэр, Iэпэ­Iэсэгъэ ин хэлъэу, шъо зэфэшъхьафхэмкIэ зэкIоу, зэдиштэу, аIапэ къызэрэчIэкIырэр къыщиIотыкIыгъ. Щэч хэлъэп, Союзыр АдыгеимкIэ творческэ кIочIэшIу, амалышIухэр зэригъотыгъэхэр ыкIи игупшысэ лэжьыгъэкIэ, тигупсэ республикэр нэмыкI шъолъыр пстэумэ къахигъэщэу, дахэу зэрэлажьэрэр. Союзым лъэпкъ зэфэшъхьафхэм ыкIи художест­веннэ еджапIэхэм ялIыкIохэр зэфищагъэх. СурэтышI- хэм етIупщыгъэу академическэ живописымкIэ къи­кIыхэзэ модернизмэм нэсыжьэу Iоф ашIэ. Илъэсыбэм къакIоцI, анахьэу я 70 — 80-рэ илъэсхэм, сурэтышI- хэм ятворчествэ графикэр къыхэщэу, къебэкIэу щытыгъ, ащ иамалкIэ лъэпкъ нэшанэр кIагъэтхъыщтыгъ. Ф. ПIэтIыуащэр, Т. Къатыр, А. Бырсырыр, А. Къуанэр, М. Тыгъужъыр, зыр зым кIырыплъыжьэу, Iоф зыдашIэхэрэм, илъэсым иуахътэхэм къапкъырыкIхэзэ, лъэпкъ шэн-хабзэхэр ыкIи адыгэ фольклор сюжетхэр къырагъэлъэгъукIыгъэх. Непи Союзым хэтхэр мы лъэныкъом къыщыуцугъэхэп, искусствэм итехникэ, игъэшIэгъоныгъэ кIагъэтхъызэ IофшIэныр лъагъэкIуатэ. Дзэукъожь Н.