Культурэм иIофышIэ гъэшIуагъэу ТIопсэ районым иIэхэм джыри нэбгырищ къахэхъуагъ.

Къалэу ТIуапсэ итеатральнэ студиеу «Карнавал» зыфиIорэм ихудожественнэ пащэу Игорь ­Морарь, псэупIэу Шаумяным и Лъэпкъ музей ипащэу Елена Мирджановам ягъусэу цIэ лъапIэр къыфагъэшъошагъ зыгъэпсэфыпIэ-культурнэ комплексэу Жьыубгъу дэтым итхылъеджэпIэ къутамэ ипащэу Зурет Костюковам. Зурет Даудэ ыпхъур Шъхьэлэхъо лIакъом къыхэкIыгъ. Къуаджэу ЦIэпс къызщыхъугъэр. Культурэм ылъэныкъо Iоф зишIэрэр илъэс 35-рэ хъугъэ. Библиотекарь къызэрыкIоу ригъэжьэгъагъ, илъэсищым ехъугъэу тхылъеджэпIиплI зыхэхьэрэ подразделением ипащ. Лъытэныгъэшхо зыфэтшIырэ тичIыпIэгъу бзылъфыгъэр IофшIэным иветеран, УФ-м ыкIи Краснодар краим культурэмкIэ яминис­терствэхэм ящытхъу тхылъхэмкIэ мызэу, мытIоу къыхагъэщыгъ. КультурэмкIэ район отделым гъэзетэу «Шапсыгъэм» къызэрэщыфаIотагъэмкIэ, Зурет ныбжьыкIэхэм Iофышхо адешIэ, иIофшIэгъухэр игъусэхэу Жьыубгъу псэупIэ коим дэсхэм афэгъэхьыгъэ хъарзынэщ ыугъоигъ, краеведением чанэу пылъ. Зурет Даудэ ыпхъум тыфэгушIо! НЫБЭ Анзор.