ТIопсэ районым ит къуаджэу КодэшъхьапI культурэм и Унэу дэтым щылэжьэрэ творческэ купхэм жъогъобын хъу­рэ сэнаущыгъэшхо зы­хэлъ артист ныбжьыкIэ­хэр щаугъоигъэх.

Джырэ уахътэм «со­циокультурнэ гупчэкIэ» еджапIэхэр, тхылъеджапIэхэр, клубхэр алъытэнхэр хабзэ хъугъэ, ау ащ фэдэ гущыIэхэр мыщ епхьылIэнхэ плъэкIыщтэп. Ар культурэм иучреж­дение къодыеп, творческэ кружокхэр щызэхащэх, Iофтхьэбзэ зэфэшъхьаф­хэр щырагъэкIокIых. Мыщ тхылъеджапIэри хэт, къо­джэдэсхэр зыщызэхэхьащтхэ чIыпIи иI, къэпIон хъумэ, ар къуаджэм «ыгу» шъыпкъэу щыт, цIыфхэр зэрещалIэх. Культурэм и Унэ щылажьэхэрэр чанэу шъолъырым итарихъ пы­лъых, чIыпIэрысмэ пкъыгъоу агъэфедэщтыгъэхэр къаугъоих, интернетыр къызфагъэфедэзэ проект гъэшIэгъонхэр агъэцакIэ. Къуаджэр зэрыгушхо­хэрэм ащыщых кIэлэцIыкIу купхэу «Жъогъобыным- рэ» «Къушъхьэмэ якIа­лэ­хэмрэ». Ахэм адэлажьэх зисэнэхьат хэшIыкIышхо фызиIэхэ Тхьагъушъэ Марыетрэ (ар культурэм и Унэ ипащ) Даур Саретрэ. Илъэс пчъагъэхэм хореографическэ купхэм плIэгъогогъо щытхъуцIэу «Щы­сэ зытырахырэр» зыфи­Iорэр къалэжьыгъ, къуа­джэм ыкIи ТIопсэ районым ащызэхащэрэ концертхэм ахэлажьэх, зы общественнэ-культурнэ Iофтхьабзэ благъэкIырэп. Джащ фэдэу ахэм Адыгеим ыкIи Краснодар краим ячIыпIэ зэфэшъхьафхэм концертхэр къащаты, гъэ­хъагъэхэри ашIы. Мызэу, мытIоу творческэ купхэр зэнэкъокъухэм ыкIи фестивальхэм ащатекIуагъэх. — ИкIыгъэ илъэсми те­кIоныгъабэ къыдэтхыгъ, — къеIуатэ Тхьагъушъэ Марыет. — Лъэпкъ зэфэшъхьафхэм къахэкIыгъэ­хэр зыхэт творческэ купэу тиIэхэр Дунэе фестиваль-­зэнэкъокъоу «Адыгеим ижъогъожъыехэр» зыфиIоу Мыекъуапэ щыкIуагъэм, Кавказ щыпсэурэ лъэпкъхэм яискусствэкIэ ящэнэ- рэ этнографическэ фестивалэу Агуе щызэхащагъэм дипломхэмкIэ къащыха­гъэщыгъэх. КъэшъонымкIэ Дунэе зэнэкъокъоу «Къызэхэгъан» («Зажигай») зыфиIоу Шъачэ щыкIощтым хэлэжьэщтхэм якъы­хэхын едзыгъо, хореографическэ искусствэмкIэ ЗэIухыгъэ фестиваль-­зэ­нэкъокъоу «Къашъом идунаеу» ТIуапсэ щыкIуагъэм, ар къашъом идунэе Ма- фэ тырагъэфэгъэ Iофтхьабзэу «ОныбжьыкIэфэ къа­шъо» зыфиIорэм къыды­хэлъытэгъагъ, ащытекIуагъэх. УФ-м илъэпкъ цIыкIумэ ахэхьэрэ шапсыгъэхэм яапэрэ лъэпкъ-культурнэ фестивалэу «Тятэжъмэ ячIыгу — си Шапсыгъэ чIыналъэр» зыфиIорэм зэрэхэлэжьагъэхэм афэшI ансамблэхэу «Жъогъо­бынымрэ» «Къушъхьэмэ якIалэхэмрэ» Краснодар краим иадминистрацие IэкIоцI политикэмкIэ и Де­партамент и Щытхъу тхылъкIэ къыхагъэщыгъэх. Тиартист ныбжьыкIэмэ зыкъызыщашIыщт чIыпIабэ джыри апэ илъ, арышъ, текIоныгъакIэхэри къыдахыщтых.