ДзюдомкIэ кIэлэцIыкIу лигэу «Триумф Energy» зыфиIорэм иятIонэрэ тур къыдыхэлъытэгъэ зэнэкъокъухэр республикэм икъэлэ шъхьаIэ щыкIуагъэх. Зыныбжь илъэс 15-м шIомыкIыгъэхэр ары мыщ хэлажьэхэрэр ыкIи команднэ дзюдом илъэныкъуакIэу щыт. Турнирыр шъолъырхэм ащы­рагъажьэ, ащ дэгъоу закъыщызыгъэлъэгъорэ спортсменхэр дунэе лигэм ифинал нэсынхэ алъэкIыщт. Джырэ уахътэм проектыр Урысыем ифедеральнэ шъолъыриблымэ ащагъэцакIэ. Ащ икIэщакIор УФ-м спортымкIэ изаслуженнэ мастерэу Иван Нифонтовыр ары. Пшъэрылъ шъхьаIэу яIэр дзюдом иклубхэр, иеджапIэхэр ыкIи исекциехэр зэзыпхырэ структурэ гъэнэфагъэ гъэпсыгъэныр, ащ епхыгъэу урысые ыкIи IэкIыб спортсменхэм, тренерхэм, организациехэм зэпхыныгъэу яIэр гъэпытэгъэныр ары. Адыгеир пштэмэ, мы спорт лъэпкъым ылъэныкъокIэ гъэхъэгъэшIухэр зиIэ шъолъырэу щыт. Ащ къыхэкIэу лигэу «Триумф Energy» зыфиIорэм республикэм икомандитIу хэлажьэ. Командэ пэпчъ нэбгыри 8 хэт. Къыблэ дивизионым хэхьэрэ командэ 15-мэ язэнэкъокъу хэлэжьэрэ самбэмкIэ олимпийскэ резервым испорт еджапIэ я 10-рэ чIыпIэм щыт. Мыщ зыкъыщагъэлъагъо Къыблэ федеральнэ шъолъырым ыкIи Абхъазым ялIыкIохэм. ДзодомкIэ спорт еджапIэу Я. Коблым ыцIэ зыхьырэм икомандэ тури 2-м ыуж очко 19 ригъэкъугъ ыкIи ятфэнэрэ чIыпIэр ыIыгъ. Ти­дзюдоистхэм къатекIон зылъэ­кIыгъэхэр пэрытныгъэ зыIыгъ Ермэл­хьаблэрэ Новороссийскэрэ якомандэхэр ары. Ермэлхьаблэ-хэр очкоуи 8-кIэ тиспортсменхэм апэ итых. Аужырэ турыр гъэтхапэм и 9-м Новороссийскэ щыкIощт ыкIи ащ къыщылъэгъощт командэ анахь дэгъур. Ар къэралыгъо мэхьанэ зиIэ едзыгъом хэлэжьэщт.