АР-м и Къэралыгъо Совет – Хасэм и Тхьаматэу Владимир Нарожнэмрэ ащ игуадзэу Цэй Эдуардрэ «Хэгъэгум иухъумакIохэр» зыфиIорэ Фондым ишъолъыр къутамэу АР-м щагъэпсыгъэм кIогъагъэх. Ащ ипащэу ПIатIыкъо Аслъан зэIукIэгъоу дыряIагъэм дзэкIолIхэмрэ ахэм ягупсэхэмрэ ящыкIэгъэ IэпыIэгъур игъом ыкIи икъоу аIэкIэгъэхьэгъэным пае Парламентымрэ Фондымрэ зэрэзэдэлэжьэщтхэм щытегущыIагъэх. Зэпхыныгъэу зэдыряIэр нахь гъэпытэгъэным фэшI Къэралыгъо Советым —Хасэм идепутат пэпчъ зыщыхадзыгъэ хэдзыпIэ коир зэрыт тхылъыр аратыгъ. Ежьхэми къутамэм епхыгъэу муниципальнэ образованиехэм Iоф ащызышIэхэрэм ятелефонхэр депутатхэм къаратыгъэх. — КъулыкъукIэу агъэпсыгъэм зэпхыныгъэ дытиIэу, шIуагъэ къы­тэу тызэдэлэжьэн фае. Ары непэрэ зэIукIэгъур зыфызэхэт­щагъэр. УФ-м и Президентэу Владимир Путинымрэ АР-м и ЛIышъхьэу КъумпIыл Муратрэ пшъэрылъэу къашIыгъэхэр гъэцэкIэгъэнхэм пае депутатхэм яамалыр зэкIэ ашIэщт. Непэ анахьыбэу тынаIэ зытетынэу зытефэхэрэм къа­лэжьыгъэ IэпыIэгъур ягъэгъо­тыгъэным фэшI тфэлъэкIыщтыр тшIэщт — къыIуагъ Владимир Нарожнэм. Фондым ишъолъыр къутамэ ипащэу ПIатIыкъо Аслъан яIофшIэн зэрэзэхащэрэм нэIуасэ къыфишIыгъэх, кабинетхэр къаригъэплъыхьагъэх, фэIо-фашIэу тидзэкIолIхэм афагъэцакIэхэрэр къафиIотагъ. — ФэIо-фэшIэ зэфэшъхьафыбэ къу­тамэм щагъэцакIэ ыкIи ахэр зэкIэ мыщ епхыгъэхэм зэрящыкIэгъэ дэдэм Iо хэлъэп. Арышъ, хэушъхьафыкIыгъэ дзэ операцием хэлажьэхэрэмрэ ахэм яунагъохэм арысхэмрэ фэгъэкIотэнэу яIэхэр, ахъщэ тынэу афагъэнэфагъэхэр хэзыгъэ имыIэу зэрыт тхылъхэр Фондым иIофышIэхэм аIэкIэдгъа­хьэмэ лые мыхъущтэу къысшIошIы, — къыIуагъ Цэй Эдуард пстэумэ ауж. ХЪУТ Нэфсэт.