ИгукъэкIыжьхэр къедгъэIуатэмэ тшIоигъоу ыдэжь тыкIуагъ. Ар нэшIо-гушIоу къытпэгъокIыгъ. Хэгъэгу зэошхор заухыгъэр илъэс 79-рэ фэдиз тешIэжьыгъэми, тыгъуасэ фэдэу а илъэсхэм яхъугъэ-шIагъэхэр ыгу къэкIыжьых:

— Тэ тичылэ нэмыцмэ штаб щызэха­щэгъагъ. Унэхэр унагъомэ къатырахыхэзэ,  нэмыцхэр арытIысхьэщтыгъэх. Командирэу яIэр тиунэ исынэу къыхахыгъагъ.     Чэмыр къакъырым къычIащи, кIэрахъокIэ еохи аукIыгъагъ. Ау зыми агу техьэ­щтыгъэп. Ежьмэ ашхыщтыр чыжьэу   къафыращыщтыгъ. Тигъунэгъумэ ячэрэз чъыгхэр раупкIыхи, а чIыпIэм   щыуанышхокIэ щыпщэрыхьэщтыгъэх. Шыхэр кумэ акIэшIагъэхэу, адис хьэхэр  къызэцэкъэкIыхэу къекIокIыщтыгъэх. Ти­дзэхэр чылэм благъэу къызекIуалIэхэм, нэмыцхэр апэуцужьыгъэх. Нэтыхъуае зыщызэзаохэм, тиунэ исыгъэ нэмыц командирым игъусагъэхэр къаукIыгъэх. Ищыгъынхэр лъы закIэу къэкIожьыгъагъ. ТидзэкIолIхэр чылэм къыдахьэхи, нэмыцхэр дафыгъэх.

Зэо ужми щыIэныгъэр къиныгъэ. Гъаблэр чылэм дэтыгъ. Ау тIэкIу-тIэкIузэ зэтеуцожьыгъэх. Тхьэм  тыщеухъум ащ фэдэ къин, щыIэныгъэ дахэм тыхэтэу тегъэпсэу.Щынджые дэкIыгъэхэу Хэгъэгу зэошхом хэкIодагъэ­хэм ащыщ Хьарэхъу зэшитфыр. Ахэм янэу Чэбэхъани ахэтэу шIэжь саугъэт паркым щафагъэуцугъ.

Адыгеир шъхьафит зыщашIыжьыгъэ мафэм, мэзаем и 18-м, тиеджэпIэ щагу дэт саугъэтхэм адэжь шIэжь зэхахьэхэр илъэс къэс ащытэшIы, къэгъагъэхэр ахэм акIэрытэлъхьэх, усэхэм тыкъяджэ. Тишъхьафитыныгъэ фэбэнагъэхэм, псэемыблэжьэу тичIыгу къэзыухъумагъэхэм яшIэжь тэгъэлъапIэ.