УФ-м и Президентэу Владимир Путиныр кIэщакIо зыфэхъугъэ лъэпкъ проектхэм ащыщэу «Бизнес цIыкIур ыкIи гурытыр, предпринимательхэр кIэщакIо зыфэхъухэрэм япхырыщынкIэ IэпыIэгъу ятыгъэныр» зыфиIорэм къыдыхэлъытагъэу АР-м мэкъумэщ хъызмэ­тымкIэ и Министерствэ фэгъэзагъэхэр икIыгъэ 2023-рэ илъэсым гъэцэкIагъэ зэрэхъугъэхэр зэфихьысыжьыгъ.

Ащ къызэритыгъэмкIэ, лъэпкъ проектыр зыщыIэм къыщыублагъэу Адыгеим ифермери 139-мэ къэралыгъо IэпыIэгъу агъотыгъ. АхъщэкIэ къэ­пIон зыхъукIэ, ар сомэ миллион 270-м шIокIы. Проектым къыдэлъытагъэхэм япхырыщын пае аштагъ программэу «Агростартап» зыфиIо­рэр. Мэкъумэщ хъызмэтыр мылъку къэкIуапIэу къыхэзыхыгъэхэм егъэ­жьапIэ ашIынэу грантхэр ятыгъэнхэм ар фэгъэ­хьыгъ. Ащ къыдыхэлъы­тэгъэ IэпыIэгъоу къэралыгъом шъолъырхэм афитIупщырэм илъэс къэс хегъахъо. ГущыIэм пае, 2022-рэ илъэсым зэкIэмкIи сомэ миллион 73-рэ федеральнэ бюджетым къыхэхыгъэу Адыгеим къыфэкIуагъ. КъыкIэлъыкIогъэ 2023-м а пчъагъэр сомэ миллион 94,4-м нагъэ­сыгъ. Ар процент 29,3-кIэ ыпэрэм атыгъэм нахьыб. Программэм ишIуагъэкIэ 2022 — 2023-рэ илъэсхэм унэе хъыз­мэтшIэпIэ 85-рэ кIэу Адыгеим щагъэп­сыгъ. ГъэрекIо нэбгырэ 42-рэ мэхъу программэм къыхиубытагъэу грантхэр зыфэкIуагъэхэр. Хэлэжьагъэхэм янахьыбэр цумпэ лъэпкъхэм е коцы, хьэ зыфэпIощтхэм якъэгъэкIын зыпылъхэр. Грант къэзыхьыгъэхэм ащыщэу нэбгырэ 15-мэ цумпэ къэгъэкIыныр къыхахыгъ, 16-р лэжьыгъэхэм апылъых, фермери 4-мэ хэтэрыкIхэр е картоф къагъэкIы, 7-р былымхъуным фэгъэзагъ. Джащ фэдэу лъэпкъ проектым ипхырыщын къыдыхэлъытагъэу мэкъумэщ кооперативхэм заушъомбгъуным фэшI яIофшIэн мылъкоу пэIухьэрэм пае субсидиехэр къэралыгъом къетых. БлэкIыгъэ илъэсым ащ пае къатIупщырэ ахъщэми къыхагъэхъуагъ. ПстэумкIи сомэ миллион 12 Адыгеим имэкъумэщ хъызмэт къыфэкIуагъ. Ар фэдитIурэ ныкъорэкIэ ыпэрэ илъэсым пэIуагъэхьагъэм нахьыб. Ахъщэр хэзыгъэ имыIэу кооперативхэм зэраратыгъэм Министерствэм къыщыкIагъэтхъы. ПстэумкIи кооперативи 4 хэфагъ. Ахъщэу афэкIуагъэмкIэ оборудованиер, автомашинэхэр, кооперативым хэтхэм япродукцие къащэфыгъэх. 2024-рэ илъэсэу къихьагъэм «Бизнес цIыкIур ыкIи гурытыр, предпринимательхэр кIэщакIо зыфэхъухэрэм япхырыщынкIэ IэпыIэгъу ятыгъэныр» зыфиIорэ лъэпкъ проектым къыдыхэлъытэгъэ Iоф­тхьабзэхэм ягъэцэкIэн пэIуагъэхьанэу сомэ миллиони 123,1-рэ федеральнэ бюджетым щыгъэнэфагъ. Ар блэкIыгъэ 2023-м атыгъэм нахьи процент 30,4-кIэ нахьыб. Субсидиехэм апэIухьанэу къа­тIупщыщтыр сомэ миллион 14,3-рэ мэхъу. Ари 2023-м пэIухьагъэм процент 19-кIэ ехъу. ХЪУТ Нэфсэт. Сурэтхэр: «Адыгэ макъэм» ихъарзынэщ.