Урысыем щырекIокIырэ Iофтхьабзэу «Сильные идеи для нового времени» зыфиIорэм изы едзыгъо изэфэхьысыжьхэр къэнэфагъэх. Къэралыгъор пытэнымкIэ, хэхъоныгъэ ышIынымкIэ екIолIакIэхэр къызщыгъэлъэгъогъэ IофшIэгъэ мин 30-у ащ къагъэхьыгъэм анахь дэгъоу къахахыгъэ проект 1000-м Адыгеим иер ахэфагъ. Ар республикэм иобщественнэ зэхахьэу «Туристическэ Адыгеим» ипроектэу «Къоджэдэсхэм ягукъэкI-гупшысэхэм яеджапI» зыфиIорэр ары. БлэкIыгъэ илъэсым къыщегъэжьагъэу шъолъырым ар щэлажьэ. ЧIыгулэжьхэр, былымахъо­хэр, къоешIхэр, зекIозещэхэр, пщэры­хьэкIо IэпэIасэхэр, Iэпэщысэхэр зы­шIыхэрэр ыкIи нэмыкI лъэныкъохэмкIэ сэнаущыгъэ зыхэлъэу чылагъохэм адэс­хэр зэфищэнхэр, яунэе Iоф зэтырагъэ­уцоным, ащ дакIоу къоджэ зекIоным зырагъэушъомбгъуным фэгъэсэгъэнхэр проектым ипшъэрылъ шъхьаI. Ащ къыдыхэлъытагъэу егъэджэнхэр рекIокIы­гъэх, ахэр къашъхьапэхи, зиIоф езыхьы­жьагъэхэри щыIэх. Республикэм иахъщэ IэпыIэгъурэ президент фондым имылъкурэкIэ проектыр гъэцэкIагъэ хъугъэ. Джы «Сильные идеи для нового времени» зыфиIорэм ахэр щылъыкIуатэхэмэ, яIофшIэн зырагъэушъомбгъун алъэкIынэу амал агъотыщт. «Мыщ фэдэ Iофым изэхэщэн игъо дэдагъ. Сыда пIомэ зекIоным ылъэ­ныкъокIэ хьакIэхэм ядгъэлъэгъущтым изэмылIэужыгъуагъэ нахьыбэ тшIын фаеу уахътэм къе­гъэлъагъо. Шъыпкъэр пIощтмэ, сэнаущыгъэ, IэпэIэсэныгъэ ин зыхэлъ цIыфхэр республикэм бэу исых. Ау ахэр зэбгырыдзыгъэх. Еджа­пIэмкIэ тигухэлъхэр ахэр зэхэтыугъоенхэшъ, нэIуасэ зэфэтшIынхэр, зэдэлэжьэныгъэ IофшIэныр дгъэпсыныр ары. Ащ ишIуа­гъэкIэ зекIохэр нахьыбэу тишъо­лъыр къетщэлIэщтых, — къыхегъэщы общественнэ зэхахьэу «Туристическая Адыгея» зыфиIорэм хэтэу, проектым икIэщакIоу Ольга Ивановам. Проект 1000-р кIэух пчъагъэп. Нахь кIасэу ахэм проекти 100, етIанэ анахь дэгъуи 10-р къахахыщт. Iофтхьабзэм изэфэхьысыжьэу къэралыгъом ипащэ ахэр рахьылIэщтых. Проектхэм ягъэцэкIэнкIэ ахъщэкIэ IэпыIэгъу афэхъущтых. Iофтхьабзэм икIэщакIор Стратегическэ гукъэкIхэмкIэ агентствэмрэ фондэу «Росконгрессымрэ». Анцокъо Ирин.