Урысые студент отрядхэм я Мафэ мэзаем и 17-м хагъэунэфыкIы. ­Илъэс 20-кIэ узэкIэIэбэжьмэ, Урысые форумэу Москва щыIагъэм ныбжьыкIэ общественнэ движе­ниеу «Урысые студенческэ отрядхэр» зыфиIорэр зэхащэгъагъ.

АдыгеимкIэ шъолъыр штабым ипащэу Ольга Борсук бэмышIэу гущыIэгъу тыфэ­хъугъ, яIофшIэн зэрэзэхащэрэр, гъэхъагъэу яIэхэр къытфиIотагъэх. — Анахь мэхьанэ зиIэ IофшIэнэу дгъэцакIэрэр студентхэм IофшIэпIэ чIыпIэ къызэрафэдгъотырэр ары. Джащ фэдэу патриотическэ пIуныгъэм тынаIэ тетэгъэты. Ащ нэмыкIэу лъэныкъо зэфэшъхьафхэмкIэ егъэ­джэнхэр афызэхэтэщэх. Хэбзэгъэуцугъэм диштэу, студент отрядхэм ахэтхэм илъэсым зэ сэнэхьат тедзэ ыпкIэ хэмылъэу зэрагъэ­гъотын амал яI. IофшIэпIэ чIыпIэ къэзыты­хэрэр нахь зыщыкIэрэ сэнэхьатхэр къыхэтэхых. Арэущтэу еджэгъэ студентхэм IофшIэн агъотыныр нахь IэшIэх къафэхъу, — еIо Ольгэ. Федеральнэ ахъщэу къатIупщырэмкIэ гурыт сэнэхьат языгъэгъотырэ еджапIэхэм зэзэгъыныгъэ адыряIэу студентхэр рагъаджэх. Анахьэу Iоф зыдашIэрэр Мыекъопэ къэралыгъо гуманитар техническэ колледжыр ары. Егъэджэнхэм ауж, шапхъэу пылъымкIэ, охътэ гъэнэфагъэм къыкIоцI студентхэм Iоф ашIэн фае. Краснодар краим ичIыпIэ зэфэшъхьафхэм макIох. Анахьэу пщэрыхьакIохэр, хьакIэщхэм Iоф ащызышIэхэрэр ары къыхахыхэрэр. — НыбжьыкIэхэр зыдэкIощт, Iоф зыщашIэщт чIыпIэхэр къыхэтхы зыхъукIэ, студентхэр гупсэфэу, зыщыпсэущтхэ чIыпIэр дэгъоу, ыпкIэ хэмылъэу къафэгъотыгъэным тыпылъ. Мы аужырэ илъэсым IофшIэпIэ чIыпIэ зыгъотыгъэ студентхэм япчъагъэ фэди 2,5-рэ хэхъуагъ. Шъачэ и Гъэхъунэ Плъыжь студент 40-мэ IофшIэпIэ чIыпIэ щядгъэгъотыгъ. МэзитIум къыкIоцI ахэм ащ Iоф щашIагъ, — еIо тигущыIэгъу. Студентым сэнэхьат шъхьаIэу зэригъэгъо­тырэм имызакъоу, ыгукIэ зыфэщэгъэ лъэныкъом ыпкIэ хэмылъэу зыфигъэсэн амал зэригъотырэм мэхьанэшхо иI. ГъэрекIо рес­публикэмкIэ студент 250-рэ фэдиз рагъэ­джагъ. ДжырэкIэ анахь къыхахырэр «сервис» зыфаIорэ лъэныкъом щылэжьэнхэр ары, ахэм сомэ мини 100 фэдиз лэжьапкIэ къахьы. Ау ащ нэмыкIэу медицинэм, кIэлэегъэджэ сэнэхьатым епхыгъэуи Iоф ашIэ. Илъэс къэс зыгъэпсэфыпIэ чIыпIэхэм Iоф ащызышIэрэ вожатэхэр рагъаджэх, ащ нэмыкIэу псэо­лъэшI ыкIи оперативнэ отрядхэр яIэх. Илъэс къэс «Черкесский десант» зыфиIорэ Iофтхьабзэр зэхащэ. ГъэрекIо гимназиеу N 5-м икIэлэеджакIохэм апае мастер-классхэр, джэгукIэхэр, зэнэкъокъухэр афызэхащагъэх. ХэушъхьfфыкIыгъэ дзэ операцием хэла­жьэ­хэрэм апае пкъыгъо зэфэшъхьафхэр зэда­шIыгъэх. Урысые ныбжьыкIэ общественнэ организациеу «Урысые студент отрядхэр» зыфи­Iорэм и Адыгэ шъолъыр къутамэ зэшъхьэгъусэхэу Ярославрэ Ольгэрэ 2015-рэ илъэсым къыщегъэжьагъэу ипащэх. Ярослав Правлением итхьамат, Ольгэ 2017-рэ илъэ­сым къыщегъэжьагъэу шъолъыр штабым ипащ. Зэшъхьэгъусэхэр студент отрядым хэтхэм яшIэныгъэхэм зэрахагъэхъощтым, зэгурыIоныгъэ азыфагу илъэу шIуагъэ къэзыхьыщт Iофтхьабзэхэр зэрэзэхащэщтым ыуж итых. Лъэныкъо зэфэшъхьафхэмкIэ грантхэр къахьыхь, яIофшIэн хэхъоныгъэхэр рагъэшIы. ДЕЛЭКЪО Анет.