Адыгеим исурэтышIхэм я Союз зызэхащагъэр илъэс 45-рэ зэрэхъугъэм фэгъэ­хьыгъэ къэгъэлъэгъонэу «Адыгеим исурэтышIхэр. БлэкIыгъэмрэ непэрэмрэ янэкIубгъохэр» зыфиIорэр КъокIыпIэм щыпсэурэ ­лъэпкъхэм искусствэм- кIэ я Къэралыгъо музей ­­и Къутамэу Мыекъуапэ дэтым къыщызэIуахыгъ.

Республикэм иджырэ сурэтышIэ нэбгырэ 30-мэ яIофшIэгъэ 70-рэ фэдиз ащ хэхьагъ. Живописир, графикэр, декоративнэ-прикладной искусствэр — мы лъэны­къохэм арылъхэу ахэр шIыгъэх. Пстэури музеим ихъарзынэщ хэ­хьэ ыкIи я 80-рэ илъэсхэм къащегъэжьагъэу непэрэ мафэм нэс Адыгеим исурэтышIхэм я Союз творческэ гъогоу къыкIугъэр къырагъэлъэгъукIы. — Къэгъэлъэгъоным тэркIэ мэхьанэ ин иI. Тимузей итарихъ Адыгеим исурэтышIхэм я Союз епхыгъ. ТисурэтышIхэм яIофшIэгъэ анахь дэгъухэмкIэ тихъарзынэщ илъэс пчъагъэхэм дгъэбаигъ. Ащ ихьатыркIэ IофшIэгъэ гъэшIэгъонхэр тиIэхэ хъугъэ. Шъыпкъэ, джыри бэ хэдгъэхъонэу тызфаер. ГущыIэм пае, керамикэр тиIэп. Арышъ, тыздэлэжьэн щыI. СурэтышIхэм я Союз ия 50-рэ илъэс ихэгъэунэфыкIын ехъулIэу хэдгъэхъон тлъэкIынэу тэгугъэ, — къыIуагъ музеим иIофышIэу Фатима Сулейма­новам. РСФСР-м исурэтышIхэм я Адыгэ къутамэ 1979-рэ илъэсым щыIэ хъугъагъэ. Ащ нэс зыхахьэщтыгъэхэ Пшызэ шъолъырым и Союз зыкъыхаушъхьафыкIи хэкум исурэтышIэ нэбгырэ 20-мэ ежь я Зэхахьэ агъэпсыгъагъ, ПIэтIыощэ Феликс ипащэу агъэнэфэ­гъагъ. РСФСР-м иавтоном хэкухэу ащ фэдэ къутамэ зиIэхэмкIэ Адыгэ хэкур апэрэу хъугъагъэ. Адыгеим исурэтышIхэм ялIэуж нахьыжъхэу В. Долговыр, Э. Овчаренкэр, Д. Мельниковыр, А. Къуанэр ыкIи нэмыкIыбэхэм ныбжьыкIэхэу еджа­пIэхэр къэзыухыгъэ къодыехэр ягъусэхэу IофшIэныр аублэгъагъ. Джы непэ Адыгеим исурэтышIхэм я Союз IэпэIэсэныгъэ ин зыхэлъ нэбгырэ 54-рэ хэт. — Сурэтхэм сахэплъагъ ыкIи зыфэзгъэунэфыжьыгъ — IофшIагъэхэр жъы хъухэрэп. Шъыпкъэ, ахэм якъызэтегъэнэни къарыу макIэп пэIухьэрэр. Ау ащ ихьатыркIэ непэ къытхэмытыжьхэм ясурэтхэр IофшIагъэхэм ахэслъэгъуагъэх, макIэми, лъэшэу сигуапэ хъугъэ. Арышъ, «тхьашъуегъэпсэу» ясэIо Iофтхьабзэр зэ­хэзыщагъэхэм, — ишIуфэс гущыIэ къыщыхигъэщыгъ УФ-м инароднэ, АР-м изаслуженнэ сурэтышIэу Къат Теуцожь. Адыгеим исурэтышIхэм ятворческэ гъогу зыфэдагъэр ясурэтхэмкIэ зэзыгъашIэ зышIоигъохэу, Iофыгъоу къырагъэлъэгъукIыщтыгъэхэр зышIогъэшIэгъонхэм зэрагъэлъэгъунхэ амал яI. «Адыгеим исурэтышIхэр. БлэкIыгъэмрэ непэрэмрэ янэкIубгъохэр» зыфиIорэ къэгъэлъэгъоным гъэтхапэм нэс Iоф ышIэщт. Анцокъо Ирин.