Саугъэтэу «Дзэ­кIолIым ипсынэкIэчъ» зыфиIорэм тыгъуа­сэ зэхахьэ щыкIуагъ. Советскэ дзэхэр Афганистан къызыращыжьыгъэхэр илъэс 35-рэ зэрэхъугъэм ар фэгъэхьыгъагъ. Iофтхьабзэм хэлэжьа­гъэх Адыгэ Республикэм ихэбзэ къулыкъушIэхэр, дзэкIолI-интернациона­листхэр, Мыекъопэ гар­низоным къулыкъур щызыхьыхэрэр, общественнэ движениехэм ялIыкIохэр, ны-тыхэр, фэхыгъэхэм яIа­хьылхэр, яныбджэгъухэр, Юн-Армием хэтхэр. Адыгэ Республикэм щыщхэу Афганистан дзэ къулыкъур щызыхьыгъэхэм яобщественнэ организацие ипащэу Николай Николенкэм пэублэ гущы­IэкIэ зэхахьэр къызэIуи­хыгъ. Ащ къызэриIуагъэмкIэ, Адыгеим икIыгъэ дзэ­кIолI 880-мэ къулыкъур Афганистан щахьыгъ, 23-р лIыхъужъэу щыфэхыгъ. Агу къытемыожьыми, лIыгъэу зэрахьагъэмкIэ непи дзэ­кIолI-интернационалистхэр къытхэтых. Ахэм яшIэжь агъэлъапIэу, псаоу къэнагъэхэм шъхьащэ афашIэу зэхахьэм цIыфыбэ къызэ­рекIолIагъэхэр ахэм зэ­ра­фэразэр ащ ипсалъэ къыщыхигъэщыгъ. Адыгэ Республикэм и ЛIышъхьэу КъумпIыл Мурат ыцIэкIэ къэгущыIагъ рес­публикэм IофшIэнымкIэ ыкIи социальнэ хэхъоныгъэмкIэ иминистрэу, Афганистан заом хэтыгъэу Мырзэ Джанбэч. — Хэгъэгум игъунапкъэ шIокIэу щыкIогъэ зэо зэ­фэшъхьафхэм ахэлэжьэгъэ дзэкIолIхэм шъхьащэ афэтэшIы. Афганистан дзэхэр къызыращыжьыгъэхэм ыуж илъэс 35-рэ тешIагъ нахь мышIэми, чIэнагъэу тшIыгъэр, зыпсэ щызгъэтIылъыгъэхэр тщыгъупшэ­хэрэп. Гушъхьэ кIуачIэу яIэр, патриот шъыпкъэу зэрэщытхэр тидзэкIолIхэм Афганистан къыщагъэлъэгъуагъ, интернациональнэ пшъэрылъэу яIэр агъэцэкIагъ. ЧIыпIэ плъырхэм ащыIэгъэ ветеранхэр джыри а сатырхэм ахэтых. Интернационалистхэу непи хэушъхьафыкIыгъэ дзэ операцием хэлажьэхэрэм шъхьащэ афэтэшIы, — хигъэунэфыкIыгъ Мырзэ Джанбэч. Джащ фэдэу министрэм къыхигъэщыгъэхэм ащыщ зэо зэфэшъхьафхэм ахэлэжьагъэхэм, ахэм ахэкIодагъэхэм яунагъохэм IэпыIэгъу ягъэгъотыгъэныр республикэм икъэралыгъо къулыкъухэм зэряпшъэ­рылъыр. ДзэкIолI-интер­националистхэр, анахьэу шъобж ыкIи уIэгъэ хьылъэу атещагъэхэм апкъ къикIыкIэ щыIэныгъэм чIыпIэ зэжъу ригъэуцуа­гъэхэр, социальнэу къызэраухъумэщтхэм пылъых. Афганцэхэм, заом иветеранхэм, ягупсэхэм мамыр­ныгъэ, псауныгъэ яIэнэу, гъэхъагъэхэр ашIынхэу ар къафэлъэIуагъ. Адыгэ Республикэм и Къэралыгъо Со­вет — Ха­сэм ыцIэкIэ къэ­гу­щыIагъ Урысыем и ЛIыхъужъэу Цэй Эдуард. — Советскэ Союзым ицIыф мин 15 зыхэкIодэгъэ Афган заор тикъэралы­гъо итарихъ чIыпIэ гъэ­нэ­фагъэ щиубытыгъ. Щытхъу хэлъэу зипшъэрылъхэр зыгъэцэкIэгъэ дзэкIолIхэм яшIэжь, лIыгъэу зэрахьагъэр тщыгъупшэщтхэп. Ахэм ащыщыбэхэм къэралыгъо тын лъапIэхэр къафагъэшъошагъэх. Непи тидзэкIолI-интернационалистхэм Урысыем и УIэшыгъэ КIуачIэхэм ясатыр хэтхэу неонацизмэм пэуцужьыгъэнымкIэ Президентэу Владимир Путиным къыгъэуцугъэ пшъэрылъхэр агъэцакIэх. ТекIоныгъэр тиеу, ахэр псаухэу къэ­кIо­жьынхэу сафэлъаIо, — хигъэунэфыкIыгъ Урысые Федерацием и ЛIы­хъужъ. Зэхахьэм къекIолIагъэ­хэм Афганистан щыфэхыгъэ тидзэкIолIхэм шъхьащэ афашIыгъ, зы такъикъэ афэшъыгъуагъэх. Саугъэтэу пчэгум итым къэгъагъэхэр кIэлъыралъхьагъэх. Iэшъынэ Сусан.