АР-м хэдзынхэмкIэ и Гупчэ комиссие ты­гъуасэ пресс-конференцие щызэхащагъ. Гупчэ комиссием итхьаматэ игуадзэу Елена Майор, исекретарэу ХьацIэцIэ Фатимэ, Мыекъуапэ ичIыпIэ комиссие итхьаматэу Татьяна Ларинам проектэу «ИнфоУИК» зыфиIорэм фэгъэ­хьыгъэу журналистхэм къафаIотагъ. УФ-м и Президент ихэ­дзынхэм япхыгъэ проектыр мэзаем и 17-м къыщегъэ­жьагъэу щыIэныгъэм щыпхыращыщт, ащ къыдыхэлъытагъэу унагъохэр къакIухьанхэу аублэщт. Гъэтхапэм и 7-м нэс республикэм ис унагъо пэпчъ еблэгъэнхэ пшъэрылъ яI. ЧIыпIэ хэдзыпIэ комиссие­хэм ахэт нэбгырэ 1022-мэ а IофшIэныр агъэцэкIэщт, ахэр пэшIорыгъэшъэу рагъэджа­гъэх, шIэныгъэу зэрагъэгъотыгъэмкIэ заушэтыжьыгъ. Хэдзынхэм афэгъэхьыгъэ къэбархэр цIыфхэм аIэкIэ­гъэхьэгъэнхэр, зымакъэ зытырэ цIыфхэр нахьыбэ хъуныр ары пшъэрылъ шъхьаIэу проектым иIэр. Шъугу къэдгъэкIыжьын, хэдзынхэр мы илъэсым гъэтхапэм и 15 — 17-м щыIэщтых. Унагъохэр къакIухьанхэм фэгъэхьыгъэ проектыр апэрэу гъэрекIо Урысыем ишъолъыр 78-мэ ащагъэфедагъ, шIуагъэ къытыгъэу, хэдзынхэм ахэлажьэхэрэм япчъагъэ процент 11-кIэ нахьыбэ хъугъэу агъэунэфыгъ. Адыгеим апэ- рэу мы шIыкIэр щагъэфе- дэщт. Мэфэ 20-м къыкIоцI хэдзыпIэ комиссиехэм ахэтэу пэшIорыгъэшъэу рагъэджа­гъэхэм унагъохэр къакIухьащтых. Хэдзынхэм афэгъэхьыгъэ къэбархэр УФ-м и Президент хъунымкIэ кандидатхэр цIыфхэм къафаIотэщтых, хэдзынхэм афэгъэхьыгъэ игъэкIотыгъэ къэбархэр зэрыт тхьапэхэр, ащ нэмыкIэу мэфэпчъхэр ыкIи блокнотхэр аратыщтых. Ащ нэмыкIэу уп­чIэ заулэ афагъэзэщт. Хэдзынхэр зыщыкIощт мафэхэм ихэдзыпIэ участкэ екIолIэн е унэм исэу ымакъэ зытын амал зимыIэщтхэм нэмыкI чIыпIэ щатын зэра­лъэкIыщтыр къафаIотэщт. Ахэм пэшIорыгъэшъ лъэIу тхылъэу атыщтхэр щылэ ма­зэм и 29-м щыублагъэу гъэт­хапэм и 11-м нэс чIыпIэ комиссиехэм зэраштэщтхэр, джащ фэдэу зыщыпсэухэрэм елъытыгъэу амакъэ зыщатыщтыр араIощт. Джащ фэдэу унэм имыкIэу умакъэ птын зэрэплъэкIыщтыр къафаIотэщт. Проектым хэлажьэхэрэр къэпшIэнхэм фэшI хэушъхьафыкIыгъэ щыгъынхэр ащы­гъыщтых. Нэбгырэ пэпчъ исурэт зытет бейдж ыпшъэ илъыщт, ащ нэмыкIэу зыщыщыр къэзыушыхьатырэ документыр ыIыгъыщт. Унагъо­хэр къэзыкIухьэрэ нэбгырэ пэпчъ хэушъхьафыкIыгъэ программэ зытет телефон ыIы­гъыщт. Участкэ пэпчъ нэбгыри 2 — 5 епхыгъэу Iоф ашIэщт. КъэIогъэн фае, ахэр унэхэм арыхьащтхэп. ЧIылъэ унэ зиIэхэм ящагухэм адэмыхьэхэу адэгущыIэщтых, ар такъикъи 3 — 4-м телъытагъ. ЦIыфхэр мыщынэхэу пчъэр къыIуахын зэралъэкIыщтыр АР-м хэдзынхэмкIэ и Гупчэ комиссие илIыкIохэм къы­хагъэщыгъ, сыда пIомэ, бзэ­джашIэхэм зэратекIырэ щы­гъынхэр ащыгъыщтых, Iэмэ­-псымэхэр аIыгъыщтых, зыщыщыр къэзыушыхьатрэ бейджхэр аIыгъыщт. Унагъохэр къэ­зыкIухьэхэрэм упчIэу къатыхэрэм яджэуапхэр къаратыжьынымкIэ тхьапэ ищы­кIагъэп, жэрыIокIэ къаIорэр ары атхыщтыр.