СамбэмкIэ Уры­сые зэ­нэкъокъоу къалэу Ка­зань щыкIорэм зы­ныбжь илъэс 20-м емыхъугъэ спортсменхэр хэ­лажьэх.

ЗэкIэмкIи нэбгырэ 700-м ехъумэ заушэты. Дунаим ыкIи Европэм япервенствэхэм ахэлэжьэщтхэр мыщ къыщыхахыщтых. ТекIоныгъэр къыдэзыхыгъэхэр дунаим ипервенствэ, я 2-рэ чIыпIэр къызфагъэшъошагъэхэр Европэм изэнэкъокъухэм ахэлэжьэщтых. Тэхъутэмыкъое спорт еджапIэу N 1-м ибэнакIохэм мэзэе мазэм гъэ­хъэгъэшIухэр ашIыгъэх. ЫпшъэкIэ зигугъу къэтшIыгъэ зэнэкъокъум иапэрэ мафэ Наш Расул текIоныгъэр къыщыдихыгъ. Ар килограмм 71-м нэс къэзыщэчыхэрэм якуп хэтыгъ, гъогогъуихэ бэнагъэ, зэкIэри къыхьыгъэх. Ащ ишIуагъэкIэ 2024-рэ илъэсым чъэпыогъум Республикэу Кипр икъалэу Ларнака щыкIощт дунаим ипервенствэ хэлэжьэнэу фитыныгъэ къыдихыгъ. Тиспортсмен ныбжьыкIэ, ащ итренерхэу Джарымэкъо Рустамрэ Азмэтрэ тафэгушIо, Расул дунаим ипервенствэ зэрифэшъуашэу зыкъыщигъэлъэгъонэу, гъэхъэгъэшIухэр ышIынхэу фэтэIо.