Мэкъумэщ хъызмэтым хэхъоныгъэхэр егъэшIыгъэнхэм ыкIи мы лъэ­ныкъом ибэдзэр­шIыпIэ игъэIорышIэн афыте­гъэпсыхьэгъэ ­къэралыгъо программэм къады­хэлъытагъэу IэпыIэгъу зэфэшъхьафыбэ щыIэ хъугъэ, зы илъэсэп шIуагъэ къатэу ахэр шъо­лъырхэм зэращыпхыращыхэрэр. ЧIыгулэжьыныр, былымхэр е щагу­бзыухэр хъугъэнхэр, нэмыкI лъэныкъоу мы хъыз­мэтым иIэхэм ащыщ мылъку къэкIуапIэу къыхэзыхыгъэхэм егъэжьапIэ ашIынэу, Iоф зышIэхэрэм зау­шъом­бгъунэу грантхэр ятыгъэнхэм ахэр афэ­гъэхьыгъэх. ЗиушъомбгъунымкIэ къышъхьэпагъ Тэхъутэмыкъое районым икъуа­джэу Пэнэхэс дэт хъыз­мэтшIапIэу пцэжъыехъуным пылъыр илъэсипшIыкIэ узэ­кIэ­Iэбэжьмэ агъэпсыгъ. Ар зиунэе предпринимателэу Дэрбэ Азамат 2021-рэ илъэ­сым хъызмэтшIапIэу Iоф зы­шIэхэрэм заушъомбгъуным пае къэралыгъо IэпыIэгъу ятыгъэным фэгъэхьыгъэ программэм хэлэжьагъ. Ащ къызэрэщыдэ­лъытагъэу, ежь имылъкоу хилъхьан фаер, нэмыкIэу ищыкIа­гъэхэр игъом ыкIи икъоу зе­гъэхьазырхэм пхырыкIыгъэхэм ахэфагъ. А илъэсым ыкIэм гран­тэу сомэ миллиони 4-м ехъу къыратыгъ. АщкIэ бассейнэу пцэжъыехэр зыщиIыгъыщтхэр, оборудованиеу ищыкIагъэр, продукциер рызэращэнэу машинэ къыщэфыгъ. ХъызмэтшIапIэм осетрэ пцэ­жъые лъэпкъхэр ары щаIыгъхэр. IофшIэпIэ чIыпIих мы уахътэм къаты. Ащ нэмыкIэуи, IофшIэнхэр бэу къызэхахьэхэмэ, зэзэгъыныгъэ шIыкIэм тетэу цIыфхэр къырагъэблагъэх.

«Агростартапыр» къыдеIагъ Мы программэр мэкъумэщ хъызмэтыр мылъку къэкIуапIэу къыхэзыхыгъэхэм егъэжьапIэ ашIынэу грантхэр ятыгъэнхэм фэгъэхьыгъ. БлэкIыгъэ 2023-рэ илъэсым федеральнэ бюджетым къыхэхыгъэу сомэ миллион 94,4-рэ республикэм къы­фэкIуагъ. Нэбгырэ 42-у программэм къыхиубытагъэхэм ащыщ Кощ­хьэблэ районым щылэжьэрэ фермерэу Хьакъуй Юрэ. Ар лы бэу къэзытырэ былымхэм ­яхъун пылъ. Грантэу къыратыгъэ сомэ миллиони 2,9-р былымхэм ящэфын пэIуигъэхьагъ. Къэралыгъо IэпыIэгъумрэ ежь мылъкоу иIагъэмрэ зызэхегъа­хъохэм, мэзи 7 — 8 зыныбжь былымышъхьэ 52-рэ къыщэфын ылъэкIыгъ. Ахэр Краснодар краим и Темрюкскэ район къырищыгъэх. «Симментальскэ» ыкIи «Абердин-ангусскэ» зыфаIорэ лъэпкъхэм ащыщых. ЕгъэжьапIэ фэхъугъ «Агростартапым» къыдыхэлъытагъэу 2022-рэ илъэсым грант къызэратыгъэхэм ащыщ мы район дэдэм икъуаджэу Блащэпсынэ щыпсэурэ Щыщэ Амэрбый. Ар бжьэхъуным пылъ. Къэралыгъо IэпыIэгъоу къыратыгъэ сомэ миллионрэ мин 270-м ехъур егъэжьапIэ ышIыгъ.

Программэм къызэрэщыдэлъытагъэу, зэкIэмкIи мылъкоу ищыкIэгъэщтым ипроценти 10 ежь иунаеу иIагъ. Грантыр хигъахъуи бжьэмэти 100, бжьэ пчIыгъэ 200 ыкIи ахэр зэрэзэрищэщтхэр къыщэфыгъэх. Президентэу Владимир Путиныр кIэщакIо зыфэхъугъэ лъэпкъ проектхэм ащыщэу «Бизнес цIыкIур ыкIи гурытыр, предпринимательхэр кIэщакIо зыфэхъухэрэм япхырыщынкIэ IэпыIэгъу ятыгъэныр» зыфиIорэм къыдыхэлъытагъэхэм ягъэцэкIэн пае аштагъ программэу «Агростартап» зыфиIорэр. Лъэпкъ проектыр зыщыIэм къы­щыублагъэу Адыгеим ифермери 139-мэ къэралыгъо IэпыIэгъу агъо­тыгъ. АхъщэкIэ къэпIон зыхъукIэ, ар сомэ миллион 270-м шIокIы. 2024-рэ илъэсэу къихьагъэм ащ пэIуагъэхьанэу сомэ миллиони 123-рэ федеральнэ бюджетым ща­гъэнэфагъ. Ар блэкIыгъэ 2023-м атыгъэм нахьи процент 30-кIэ нахьыб. ХЪУТ Нэфсэт.