Донбасс щыпсэурэ цIыфхэр къэухъумэгъэнхэм фытегъэ­псыхьэгъэ хэушъхьафыкIыгъэ дзэ операциер зэрэрагъэжьэщтым фэгъэхьыгъэ унашъом Урысые Федерацием и Президентэу Владимир Путиныр зыкIэтхагъэр мэзаем и 24-м илъэси 2 мэхъу. Ащ фэгъэхьыгъэ Iофтхьабзэу мы мафэхэм Москва щызэхащагъэм Адыгэ Республикэм и ЛIыкIо гъэIорышIапIэу Урысые Федерацием и Президент дэжь щыIэм ипащэ ипшъэрылъхэр зыгъэцэкIэрэ Фатима Романовар хэлэжьагъ. ХэушъхьафыкIыгъэ дзэ операциер рамыгъажьэзэ Донбасс щыпсэущтыгъэхэм ящыIэкIэ-псэу­кIэ зыфэдагъэм, илъэси 8-м къыкIоцI къинэу алъэгъугъэм, цIыфэу хэкIодагъэм ипчъагъэ, унэу акъутагъэхэм Донецкэ На­роднэ Республикэм и ЛIыкIоу Урысые Федерацием щыIэ ­Ольга Макеевар къатегущыIагъ. 2014-рэ илъэсым Украинэм къыщыхъугъэ хъугъэ-шIагъэхэм ауж цIыфхэм националистхэм защаухъумэн фаеу зэрэхъугъагъэр, Урысыем иIэпыIэгъу ахэм зэрящыкIэгъагъэр ащ къыIуагъ. УФ-м Донбасс ицIыфхэм агоуцуагъэу, республикитIур къыу­хъумэнхэу ыпшъэ зэрэрилъхьажьыгъэм мэхьанэшхо зэриIэр Донецкэ Народнэ Республикэм и ЛIыкIо къыхигъэщыгъ. Iофтхьа­бзэм къыдыхэлъытагъэу Донбасс щыпсэурэ цIыфхэм къинэу алъэгъугъэр къэзыушыхьатырэ сурэт ыкIи видеотехыгъэхэр къагъэлъэгъуагъэх. ДЕЛЭКЪО Анет.