Ащ фэгъэхьыгъэ зэхахьэ Мыекъопэ къэралыгъо технологическэ университетым тыгъуасэ апшъэрэ еджапIэм щыкIуагъ. Апшъэрэ еджапIэм Гупчэр хэтэу Iоф ышIэщт.

Апэрэ, ятIонэрэ ыкIи ящэнэрэ курсхэм ащеджэрэ студентхэр зэхахьэм хэлэжьагъэх. Дзэ егъэджэнхэр зыфэдэщтхэр, шIуагъэу ащ пылъыр, щеджэ­хэрэм амалэу яIэщтхэр къафа­Iотагъэх. Апшъэрэ еджапIэм иегъэ­джэн-методическэ гъэIорышIапIэ ипащэ игуадзэу, приемнэ комиссием ипащэу Бэрзэдж Розэ къызэриIуагъэмкIэ, УФ-м и Пра­вительствэ иунашъокIэ 2024-рэ илъэсым щылэ мазэм и 31-м къыщегъэжьагъэу Дзэ егъэджэн гупчэр щыIэ хъугъэ. Лъэны­къуитIукIэ студентхэм дзэ ухьазырыныгъэ зэрагъэгъотын амал яIэщт. Пилот зэрымыс быбырэ аппаратхэм яшIын ыкIи ягъэцэкIэжьын япхыгъэ авиационнэ механикхэр, операторхэр агъэ­хьазырыщтых, ахэр сержантэу е рядовойхэу еджэныр къау­хыщт, УФ-м и УIэшыгъэ КIуа­чIэ­хэм язапас хэхьащтых. ХэгъэгумкIэ дзэм фэгъэхьыгъэ егъэджэн гупчэ къызэIузы­хыгъэ шъолъырхэмкIэ Адыгеир я 82-рэ хъугъэ. ДжырэкIэ Урысыем ит апшъэрэ еджапIэхэм дзэ егъэджэн гупчи 120-мэ Iоф ащашIэ, ахэм нэбгырэ мин 57-рэ ачIэс. 2023-рэ илъэсым игъэтхэпэ мазэ къыщегъэжьагъэу гупчэм икъызэIухын фэгъэхьыгъэ Iофыгъохэм апшъэрэ еджапIэр ауж ит. Урысыем зыкъэухъумэжьыгъэнымкIэ и Министерствэ, АР-м и ЛIышъхьэу КъумпIыл Мурат яIэпыIэгъоу гупчэр зэхащагъ. Урысыем Ошъогу-космическэ кIуачIэхэмкIэ икомандование ШъхьаIэ ыгъэнэфэгъэ дзэ ухьазырыныгъэ програм­мэмкIэ гупчэхэм студентхэм шIэныгъэ щарагъэгъотыщт. — Мы илъэсым Iоныгъом и 1-м егъэджэнхэр аублэщтых. Зэнэкъокъу шIыкIэм тетэу шIои­гъоныгъэ зиIэхэм ятхылъхэр тштэщтых. Мыекъопэ къэралыгъо технологическэ университетым специалитет програм­мэмкIэ апэрэ курсым къыщегъэжьагъэу ящэнэрэм нэс, ба­калавриат программэмкIэ апэрэ ыкIи ятIонэрэ курсхэм ащеджэхэрэр ары тштэщтхэр. Медицинэ сэнэхьат зэзыгъэ­гъотыхэрэр ахэм ахахьэхэрэп. Студентхэм якъыхэхын тIоу зэ­тефыгъэщт — пэшIорыгъэшъ ыкIи къыхэхын шъхьаIэр. Сэнэ­хьатэу къыхахыгъэмкIэ еджэнхэр зэпамыгъэоу тхьамафэм зэ дзэм епхыгъэ сэнэхьатри зэ­рагъэгъотын алъэкIыщт, — еIо Бэрзэдж Розэ. 2024-рэ илъэсым Мыекъопэ къэралыгъо технологическэ университетым истуденти 100 фэдиз курсант хъущтых. Егъэ­джэнхэр илъэситIо кIощтых, апэрэр теоретическэу, ятIонэрэр практическэу зэхащэщт. КIэухым дзэ-учетнэ сэнэхьатымкIэ ныбжьыкIэхэм заушэтыжьыщт, ащ зэфэхьысыжьэу фэхъурэм елъытыгъэу студентхэм дзэ звание аратыщт. Урысыем и Ошъогу-космическэ кIуачIэхэм якъулыкъушIэу, подполковникэу Н. Самадьяновым Дзэ егъэджэн гупчэм шIуагъэу пылъыр нэужым студентхэм къафиIотагъ. Ащ къызэриIуагъэмкIэ, мыр къэзыухыгъэхэр дзэм къулыкъу щызыхьыгъэхэм арагъэпшэщтых, УФ-м и УIэшыгъэ КIуачIэхэм язапас сержантэу е рядовоеу хэхьащтых, дзэ звание яIэщт. Дзэ билет зэряIэщтым ишIуагъэкIэ къэралыгъо къулыкъухэм зэкIэми IофышIэ аIухьанхэ амал яIэщт. — Мыекъопэ къэралыгъо технологическэ университетым иректорат, Адыгэ Республикэм и ЛIышъхьэ, Урысыем и Ошъогу-­космическэ кIуачIэхэр яIэпыIэгъоу гупчэр къызэIуахыгъ. Ащ шIуагъэ пылъэу Iоф ышIэнэу тэгугъэ. Курсантхэм шIэныгъэ арагъэгъотыным пае ящыкIэ­гъэщт Iэмэ-псымэхэмкIэ гупчэр зэтегъэпсыхьагъ. Мы апшъэрэ еджапIэм истудентхэм дзэм фэ­гъэхьыгъэ сэнэхьат зэрагъэ­гъотынэу къетэгъэблагъэх. Илъэ­ситIукIэ апэрэ студентхэм дзэ билетхэр ыкIи погонхэр афэдгъэшъошэщтых, — къыIуагъ Н. Самадьяновым. Зянэ-зятэхэр зышъхьарымытыжьхэр ыкIи лъыплъэн зимы­Iэжьхэр, дзэм къулыкъу щызы­хьыхэрэм якIэлэцIыкIухэр фэгъэкIотэнхэр яIэхэу егъэджэн гупчэм чIэхьанхэ алъэкIыщт. ДЕЛЭКЪО Анет.