Бын Iужъур – гъэбэжъу
Краснодар краим имуниципалитетхэм ащыпсэухэу медалэу «Родительская доблесть» зыфиIорэр мы илъэсым къызыфагъэшъошэн алъэкIыщтхэм ацIэ къыраIуагъ. Илъэси 3-кIэ узэкIэIэбэжьмэ, сабыи 4 ыкIи ащ ехъу зыпIурэ ны-тыхэм яшъолъыр зэнэкъокъу щатекIогъагъэр Нэгъуцу Джанболэтрэ Майзэтрэ яунагъоу Агуй-Шапсыгъэ дэсыр ары. Ныбэхэм яунагъоу мы къуаджэм щыщым ащ фэдэ медаль мыгъэ къыратын ылъэкIыщт. Ныбэ Джамбулатрэ Щамсэтрэ зы щыIэныгъэ гъогу зырыкIохэрэр илъэс 20 хъугъэ. Джамбулат СССР-м дзюдомкIэ спортым имастер, спорт еджапIэм ипэщагъ, ТIопсэ рйоным дзюдомкIэ ыкIи самбэмкIэ ифедерацие ипрезидентыгъ, район советым идепутатыгъ, илъэсыбэ хъугъэу хы ШIуцIэ Iушъом щыпсэурэ шапсыгъэхэм я Адыгэ Хасэ иIофшIэн чанэу хэлажьэ. Ишъхьэгъусэу Щамсэт Нэпсэухэм япхъу, унэгъо хъызмэтыр зэрехьэ. Ахэм якIалэхэу Амиррэ Тамерланрэ самбэмкIэ ыкIи дзюдомкIэ дунэе, урысые, шъолъыр зэнэкъокъухэм пчъагъэрэ текIоныгъэ къащыдахыгъ. Апхъухэу Аминэрэ Теерэ еджэх, спортым, къашъохэм, творчествэм афэщагъэх.