ТIопсэ районым ит къуаджэу Агуй-Шапсыгъэ игурыт еджапIэу Тхьагъушъэ Нухьэ ыцIэ зыхьырэр загъэпсыгъэр илъэс 95-рэ зэрэхъурэр мыгъэ хигъэунэфыкIыщт. [caption id="attachment_146174" align="aligncenter" width="800"] Ныбэ Анзор[/caption] Адыгабзэм ыкIи адыгэ культурэм язегъэушъомбгъун фытегъэпсыхьэгъэ IофшIэнэу ащ щызэшIуахыхэрэм къадыхэ­лъытагъэу, кIэлэегъаджэхэмрэ кIэлэеджа­кIохэмрэ зэдеIэхэзэ Урысые мессендже­рэу «Телеграмм» зыфиIорэм ныдэлъфы­бзэм фэгъэхьыгъэ нэкIубгъо (блог) джы­рэблагъэ щагъэпсыгъ. «Адыгабзэм ишъэфхэр» зэреджагъэ­хэр, тиныдэлъфыбзэ, ащ итарихъ, инэшанэхэм нэIуасэ уафишIыщт. — Апэрэ гущыIэхэм якъэхъукIэ, бэрэ къыкIаIотыкIыжьырэ гущыIэ щэрыоу хэтхэр, адыгабзэм тикультурэ зэригъэпсырэр тинэкIубгъо еджэхэрэм къафэтIотэщтых, — къыхигъэщыгъ адыгабзэмрэ литературэмрэкIэ кIэлэегъаджэу Ацумыжъ Сабринэ. — Уезыгъэгупшысэрэ Iоф­шIэн гъэшIэгъонэу адыгабзэр нахь куоу озыгъэшIэщтхэр, гущыIакIэхэм уащызыгъэгъо­зэщтхэр ащ къидгъэхьащтых. КIэлэцIыкIухэмрэ зихэхъогъу­хэмрэ яшIэныгъэхэр ауплъэ­кIунхэм фэшI зэнэкъокъухэм, викторинэхэм ахэлэжьэнхэ алъэкIыщт. Арышъ, къэбарыкIэхэм, хъугъэ-шIа­гъэхэм шъуащыгъозэным, адыгабзэм изэгъэшIэнкIэ упчIэу шъуиIэхэм яджэуап­хэр жъугъотынхэм апае «Адыгабзэм ишъэфхэр» зыфиIорэ нэкIубгъом шъу­лъыплъ! Ныбэ Анзор.