Футбол клубэу «Кичмай» зыфиIорэр зызэхащагъэм щегъэжьагъэу апэрэу Шъачэ щызэхащэрэ зэнэкъокъум текIоныгъэр къыщыдихыгъ. Мы мафэр къэсыгъ. Командэр шIу зылъэгъурэ ыкIи ащ лъыплъэрэ цIыфхэр илъэс 15 фэдизрэ ежагъэх ПсышIопэ районым икъуаджэ къэзыгъэлъэгъорэ «Кичмай» иапэрэ текIоныгъэ. СпортымкIэ мастерэу Кобл Мэдинэ ыгъэсэрэ командэм Шъачэ и Кубок къыфагъэшъошагъ. Мы текIоныгъэм мэхьанэшхо иI, ар командэм иешIакIэкIэ, игуетыныгъэкIэ къылэжьыгъ. Шъачэ ичемпионат пчъагъэрэ хагъэунэфыкIырэ чIыпIэхэр къащыдихыгъ, ау апэрэ хъунымкIэ тIэкIу дэдэ ренэу щыкIэщтыгъ. БлэкIыгъэ 2023-рэ илъэсым къуаджэм ифутболистхэм ягухэлъ къадэхъугъ. — Сыд фэдэрэ текIоныгъи мэхьанэшхо иI, ау Шъачэ икомандэ 16-мэ уянэкъокъузэ апэрэ ухъуныр зымыуасэ щыIэп, — еIо тренерэу Кобл Мэдинэ. — Ти­кIа­лэхэм ухьазырыныгъэ дэгъу къагъэлъэгъуагъ, амалэу яIэр рахьылIи текIоныгъэм фэбэнагъэх. Финалныкъом ыкIи финалым пенальтикIэ тащытекIуагъ «Апсны» ыкIи «Лион». Мы текIоныгъэр къалэ­жьыгъ тикомандэ къыфэгумэкIырэ ыкIи шIу зылъэгъурэ цIыфхэм. Ахэм ар афэтэгъэшъуашэ. Адлер щыкIогъэ финал ешIэ­гъум ыуж «Кичмай» къыфагъэшъошэгъэ Кубокыр футболистхэм аIэтыгъ. Командэм хэтых Александр Титовыр, Кобл Адам, Хьах Байзэт, Нэпсэу Хъалид, Зэфэс Налбый, Данила Ломоносовыр, Давид Хачарян, ТIэшъу Заур, Владимир Хачарян, Дмитрий Ахримовыр, Александр Маринушкиныр, Евгений Корзинкиныр, Балэ Рустам, Тимур Хачарян, Кобж Заур, Кобл Саид, Никита Пархоменкэр, Дмитрий Костенкэр, Николай Карповыр, Игорь Морозовыр, Юрий Карибовыр, Кобж Мэдин. Футболистхэм ыкIи ахэм ятренер тафэгушIо, тапэкIи мыщ фэдэ гъэхъэгъэшIухэр ашIынхэу афэтэIо. Ныбэ Анзор.