[caption id="attachment_146164" align="aligncenter" width="800"] Фото: Артур Лаутеншлегер.[/caption] БэнэкIо дэгъухэр Адыгеим щагъэсагъэх, республикэм ыцIэ спортым лъагэу щаIэтыгъ. Ахэм ащыщ зэлъашIэрэ чемпионэу ыкIи тренерэу Емыж Арамбый.Адыгэ Республикэм и Лъэпкъ тхылъеджапIэ икIэщакIоу, дзюдомкIэ заслуженнэ мастерэу, спортымкIэ дунэе класс зиIэ мастерэу, 1980-рэ илъэсым щыIэгъэ Олимпиадэ джэгунхэм текIоныгъэ къащыдэзыхыгъэу, Европэм ыкIи СССР-м ячемпионатхэм япризерэу, Урысыем изаслуженнэ тренерэу Емыж Арамбый Ибрахьимэ ыкъом зэIукIэгъу гъэ­шIэгъон дашIыгъ. Iофтхьабзэм къырагъэблэгъагъэх Арамбый иныбджэгъу зэлъа­шIэрэ спортсменхэр, спортым иветеранхэр, тренерхэр, Адыгэ къэралыгъо университетым физическэ культурэмкIэ ыкIи спортымкIэ и Институт икIэлэегъа­джэхэмрэ студентхэмрэ, нэмыкI­хэри. Зэхахьэр зэрищагъ тхылъ­еджапIэм иIофышIэу Кучмэз Аминэт. Ащ къызэриIуагъэмкIэ, Iофтхьабзэм изэхэщэнкIэ пшъэ­рылъэу яIагъэр къыткIэхъухьэрэ лIэужхэр спортым идунай хэщэгъэнхэр, Адыгеим щызэлъашIэрэ спортсменхэм гъэхъагъэу яIэхэр ягъэшIэгъэнхэр, япсауныгъэ агъэ­пытэнымкIэ спортым мэхьанэу иIэр агурыгъэIогъэныр, патриотизмэ ахэлъэу пIугъэнхэр ары. [caption id="attachment_146165" align="aligncenter" width="800"] Фото: Артур Лаутеншлегер.[/caption] Емыж Арамбый ыныбжь мэзаем и 9-м илъэс 71-рэ хъугъэ, джащ фэдэу дзюдом республикэм хэхъоныгъэ щишIыным ышъхьэкIэ иIахьышхо зэрэхишIыхьагъэм пае республикэм иапшъэрэ тынэу медалэу «Адыгеим и Щытхъузехь» зыфиIорэр къыфагъэшъошагъ. ЗэIукIэм къекIолIагъэхэр ягуапэу Арамбый имэфэкIкIэ ыкIи игъэ­хъагъэхэмкIэ фэгушIуагъэх. Ащ къыкIэлъыкIоу ансамблэу «Ошъу­тенэм» хэтхэм орэд дахэхэр къыфаIуагъэх. Нэужым зэлъашIэрэ спортсменым ищыIэныгъэ гъогу кIэкIэу къытегущыIагъ Аминэт. Арамбый 1953-рэ илъэсым Теуцожь рай­оным ит къуаджэу Аскъэлае къыщыхъугъ. Мыщ дэт гурыт еджапIэм ия 9-рэ класс къызеухым, Мыекъопэ мэкъумэщ техникумым чIэхьагъ, самбэ бэнэнымкIэ ар гупчэу щытыгъ, ащ къыщыублагъэу самбэм зыфигъа­сэу ыублагъ. Ащ апэрэ тренерэу иIагъэр Хъуажъ Нурбый. Нэужым, илъэсныкъо тешIагъэу, СССР-м изаслуженнэ тренерэу Кобл Якъу­бэ ыштагъ. СССР-м ыкIи IэкIыб къэралхэм бэрэ текIоныгъэр ыкIи хагъэунэфыкIырэ чIыпIэхэр къащихьыгъэх. 1980-рэ илъэсым СССР-м ичемпионат ятIонэрэ чIыпIэр къыщыдихи, Олимпиадэ джэгунхэм ахэлэжьэнэу хахыгъ. Москва щыкIогъэ гъэмэфэ Олимпийскэ джэгунхэм ахэлажьэзэ, килограмм 60-м нэс къэзыщэ­чыхэрэм ябэныгъ, ящэнэрэ чIыпIэр къыдихи, чемпион хъугъэ. Орденэу «За заслуги перед Оте­чеством» зыфиIорэм имедалэу я II-рэ шъуашэ зиIэр къыфагъэ­шъошагъ. Арамбый иныбджэгъухэу, спорт­сменхэу, Адыгэ Хасэм итхьаматэу ЛIымыщэкъо Рэмэзан, Адыгэ республикэ спорт еджапIэу N 2-м ипащэу, Урысыем, Адыгеим язаслуженнэ тренерэу Хъот Юныс, АКъУ-м физическэ культурэмкIэ ыкIи дзюдомкIэ ифакультет идеканэу Ахътэо Руслъан, спортымкIэ мастерэу Тюльпэрэ Мыхьамэт, нэмыкIхэми Арамбый гущыIэ фабэхэр къыфаIуагъэх, ягукъэкIыжьхэмкIэ зэхахьэм къекIолIагъэ­хэм къадэгощагъэх. ЗэкIэми зэдырагъа­штэу къыхагъэщыгъ Арамбый спортым гъогу мыпсынкIэ къызэрэщикIугъэр. Ащ «техникэу» ыгъэфедэщтыгъэр анахь дэгъоу бэрэ къыхагъэщыщтыгъ. Зэрэспортсмен бэлахьым имызакъоу, цIыфышIоу, ныбджэгъу­шIоу зэрэщытыр зэкIэми къыкIагъэтхъыгъ. Нэужым спортым пыщэгъэ кIэлэцIыкIухэм яупчIэхэр А. Емыжым фагъэзагъэх ыкIи сэмэркъэушхо хэлъэу ахэм джэуапхэр къариты­жьыгъ. Сыд фэдэрэ лъэ­хъани Арамбый игукъэкIыжьхэр жъы хъухэрэп. БэнэпIэ алырэ­гъум зэIукIэгъоу щыриIагъэхэр непи ынэгу кIэтхэу къеIуатэх. Спортышхом гъогоу къыщикIугъэм анахьэу къыщыхигъэщырэр Мые­къопэ бэнэпIэ еджапIэм зызэрэщигъэсагъэр ары. — Спортым сищыIэныгъэ есымыпхыгъагъэмэ, сшынахьыжъ фэдэу автомобилист сыхъущт­гъагъэ. ЩысэтехыпIэу сиIагъ дзюдомкIэ ыкIи самбэмкIэ СССР-м, Европэм ячемпионэу Владимир Невзоровыр. ЗэкIэмэ анахь шъхьаIэр щэIагъэ къызхэбгъэфэныр, техникэм зыфэбгъэсэныр ары, — къариIуагъ ныбжьыкIэхэм Арамбый. Емыж Арамбый ищыIэныгъэ къизыIотыкIырэ ыкIи игъэхъагъэ­хэр зыдэт тхылъхэр, гъэзетхэр тхылъеджапIэм икъэгъэлъэгъуапIэ къыщыфызэIуахыгъ. Гуфэбагъэ хэлъэу ыкIи гъэшIэгъонэу зэIукIэгъур кIуагъэ. КIАРЭ Фатим. Сурэтхэр: А. Лаутеншлегер.