Педагогикэ шIэныгъэхэмкIэ кандидатэу, доцентэу, Мыекъопэ фотоклубэу «Лэгъонакъэ» хэтэу Еутых Саидэ икъэгъэлъэгъонэу «Очарование странствий» зыфиIорэр АР-м исурэт къэгъэлъэгъуапIэ мэзаем и 12-м щегъэжьагъэу щэкIо. Ащ дакIоу сурэттехым иегъэджэн Iофтхьабзэу «Законы композиции в художественной фотографии» зыфиIорэр гъэшIэгъонэу ыгъэпсыгъ. Сурэт­хэр зэрэтырихы­хэрэм, темэр ыкIи сурэтым гу­пшысэу ахилъхьащтыр къы­зэрэхихырэр, нэмыкI­хэм ар къатегущыIагъ. Тыкъэзыуцухьэрэ дунаим еплъыкIэу фыуиIэр сурэтымкIэ къэбгъэлъэгъо­ным фэшI пэшIорыгъэ­шъэу зыбгъэхьазырыным, тари­хъыр зэбгъэшIэным ямэхьанэ къыриIотыкIыгъ. — Непэрэ егъэджэным фэдэ десэхэр Къэрэщэе-­Щэрджэс Республикэм щызэхэтщагъэх. Сурэттех ныбжьыкIэ 15-мэ яIофшIэгъэ анахь дэгъухэр къы­хэтэгъэщых, шIухьафтынхэр ятэты. Мы сэнэхьатым фэлэжьэщт ныбжьыкIэхэм десэр ашIогъэшIэгъон, — еIо Еутых Саидэ. Адыгеим иеджэпIэ зэ­фэшъхьафхэм къарыкIыгъэ сурэттеххэр IэпэIасэм гущыIэгъу зэрэфэ­хъугъэхэм ыгъэрэзагъэх. Ахэм афызэхащэгъэ зэ­нэкъокъум текIоныгъэр къыщыдэзыхыгъэхэм ащыщых Иван Масленниковыр, Анастасия Чудановар ыкIи Делэкъо Ларисэ. Узыгъэгъозэрэ сурэттехым нахьыбэрэ уIукIэ зэ­рэпшIоигъор зэхахьэм къекIолIагъэхэм хагъэунэфыкIыгъ. Еутых Саидэ иIофшIагъэхэм якъэгъэлъэгъон мэ­заем и 18-м нэс зэIу­хыгъэщт. Искусствэр зы­шIогъэшIэгъонхэр сурэтхэм яплъынхэу зэхэща­кIохэм рагъэблагъэх. Лъэпшъыкъо Фатим.