ЗэзэгъыныгъэкIэ къулыкъу
ХэушъхьафыкIыгъэ дзэ операцием хэлажьэхэрэм ащыщыбэхэм зэзэгъыныгъэкIэ къулыкъур къыхахыгъ. ДзэкъулыкъушIэхэм ыкIи ахэм яунагъохэм къэралыгъор IэпыIэгъу афэхъузэ, ахъщэ тын зэфэшъхьафхэр афигъэнэфагъ.
УФ-м зыкъэухъумэжьынымкIэ и Министерствэ зэзэгъыныгъэкIэ къулыкъур щихьынэу кIатхэхэрэм зэтыгъо ахъщэ тынэу Адыгеим щаратырэм зэхъокIыныгъэ фашIыгъ. ХэушъхьафыкIыгъэ дзэ операцием хэлажьэхэрэм сомэ мин 300, зэзэгъыныгъэм кIэтхагъэхэу резервнэ полкхэм къулыкъур ащызымыхьыщтхэм сомэ мин 200 аратыщт. Зэтыгъо ахъщэ тыныр къыуатыным фэшI Адыгэ Республикэм идзэ комиссариатхэм яучет ухэтын ыкIи УФ-м зыкъэухъумэжьынымкIэ и Министерствэ зэзэгъыныгъэм удыкIэтхэн фае. ЫпшъэкIэ зигугъу къэтшIыгъэхэм анэмыкIэу, хэушъхьафыкIыгъэ дзэ операцием хэлажьэхэрэм апае къалэу Мыекъуапэ идзэ комиссариат IэпыIэгъукIэ ареты. УФ-м зыкъэухъумэжьынымкIэ и Министерствэ ипэрыт дзэ частьхэм къулыкъур ащызыхьынэу зэзэгъыныгъэм кIатхэрэм зэолI шъуашэхэр къырищэфынхэу зэтыгъоу сомэ мин 50 ритыщт. Ащ епхыгъэ унашъом 2024-рэ илъэсым мэзаем и 1-м къыщегъэжьагъэу кIуачIэ иIэ хъугъэ. ЛъэIу тхылъэу къатырэм тетэу ахъщэ тыныр Мыекъопэ къэлэ администрацием афетIупщы. Зэтыгъо ахъщэ IэпыIэгъур къаратынымкIэ тхылъхэр зэрахьылIэщтыр социальнэ программэхэмкIэ муниципальнэ отделыр ары (къ. Мыекъуапэ, ур. Пионерскэр, 374-А). ЗэрэхъурэмкIэ, хэушъхьафыкIыгъэ дзэ частьхэм къулыкъу ащихьынэу зэзэгъыныгъэ кIатхэрэ дзэкъулыкъушIэм зэтыгъоу сомэ мин 600 фэдиз ыкIи зэолI шъуашэхэр къызэрищэфын ылъэкIыщт сомэ мин 50 къыратыщт. Зэзэгъыныгъэм кIатхэ ыкIи игъэкIотыгъэ къэбар зэзыгъашIэ зышIоигъохэр къалэу Мыекъуапэ идзэ комиссариат зыфагъэзэн алъэкIыщт: ур. Комсомольскэр, 217, телефоныр: 8(8772) 52-11-27.