Ректорым ихэдзынхэр щыIэщт
Мыекъопэ къэралыгъо технологическэ университетым иректор ихэдзынхэм афэгъэхьыгъэ конференцие мэзаем и 19-м зэхащэщт. Блыпэм къыщегъэжьагъэу мы апшъэрэ еджапIэм иструктурнэ подразделениехэм яIофшIэкIо купмэ зэIукIэхэр зэхащэх, конференцием хэлэжьэщтхэр агъэнафэх. Шъугу къэдгъэкIыжьын, 2023-рэ илъэсым тыгъэгъазэм и 26-м УФ-м шIэныгъэмкIэ ыкIи апшъэрэ гъэсэныгъэмкIэ и Министерствэ ыгъэнэфэгъэ графикымкIэ ректорым ихэдзынхэм афэгъэхьыгъэ Iофтхьабзэхэр аублагъэх. Ректор хъунымкIэ кандидатхэр мэзаем и 6-м УФ-м шIэныгъэмкIэ ыкIи апшъэрэ гъэсэныгъэмкIэ и Министерствэ иаттестационнэ комиссие пхырыкIыгъэх ыкIи хэдзынхэм ахэлэжьэнхэ фитыныгъэ къаратыгъ. Ахэр: Къуижъ Саида — МКъТУ-м иректор, экономикэ шIэныгъэхэмкIэ доктор, Шъхьэлэхъо Анзаур — апшъэрэ еджапIэм итехнологическэ факультет идекан, техническэ шIэныгъэхэмкIэ доктор, Наталья Чудесовар — университетым иеджэпIэ-методическэ гъэIорышIапIэ ипащ, экономикэ шIэныгъэхэмкIэ кандидат. ШIэныгъэлэжьхэм ясовет мы къэбарыр къыщиIуагъ Мыекъопэ къэралыгъо технологическэ университетым иректор ихэдзынхэм фэгъэзэгъэ комиссием итхьаматэу Татьяна Овсянниковам. Джащ фэдэу структурнэ подразделение пэпчъ лIыкIо пчъагъэу конференцием къыгъэкIощтыр щагъэнэфагъ ыкIи мэзаем и 19-м хэдзынхэр зэхащэнхэу зэдаштагъ. Ащ фэгъэхьыгъэ игъэкIотыгъэ къэбар МКъТУ-м исайт нэкIубгъоу «Выборы ректора» зыфиIорэм ит. Апшъэрэ еджапIэр къызызэIуахыгъэр илъэс 30 зэрэхъугъэм фэгъэхьыгъэу гъэхъэгъэшIухэр зышIыгъэхэм щытхъу ыкIи рэзэныгъэ тхылъхэр аратыжьыгъэх. Мыекъопэ къэралыгъо технологическэ университетым ипресс-къулыкъу