«Адыгэ макъэм» ипроек­тыкIэмэ ащыщ адыгабзэм фэщэгъэ ныбжьыкIэхэр къыхэгъэщыгъэнхэр, ахэр лъэпкъ гъэзетым ныбджэгъушIу фэшIыгъэнхэр, журналистикэм апэрэ лъэбэкъухэр щашIынымкIэ IэпыIэгъушIу афэхъугъэныр.

Ащ фэдэу редактор шъхьаIэу МэщлIэкъо Саидэ редакцием ижурналистхэр игъусэхэу Теуцожь ыкIи Тэхъутэмыкъое районхэм ащыIагъэх, Пэнэжьыкъое ыкIи Щынджые гурыт еджапIэхэм якIэлэеджакIохэм зэIукIэгъухэр адыряIагъэх. Ахэм япэгъокIэу «Адыгэ макъэм» апэрэ лъэбэкъу къыфэзыдзыгъэхэр Щынджые гурыт еджапIэу N 24-м икIэлэеджакIохэу Талъэкъо Дамиррэ Къушъэкъо Альбинэрэ. КIэлэеджэкIо нэутхэу Талъэкъо Дамир Щынджые гурыт еджапIэм щыкIогъэ зэIукIэгъум тынаIэ щытетыдзагъ. Чылэм къыдэкIыгъэ журналист цIэрыIохэр ашIэ­хэмэ редактор шъхьаIэр зыкIэупчIэм, Дамир ыIэ къы­Iэти, ЕмтIылъ Нурбый ыцIэ къыриIуагъ. Ар тигуапэ хъугъэ ыкIи нэшIукIэ тызэригъэплъыгъ. Лъэпкъ гъэзетыр къы­зэрэдэкIырэм нэIуасэ зы­фэтэшIыхэ нэ­ужым, ежь кIэлэеджакIо­хэми гущыIэгъу тафэхъугъ. Мыщ дэ­жьыми Талъэкъо Да­мир къахэщыгъ, адыгабзэкIэ зэригъэ­шIэгъэ езбырым къеджагъ. КъыIорэр IупшIыкIэу, ыгу къыдеIэу, ишъыпкъэу зы­къыдишIызэ къэгъэлъэгъон псау къы­шIыгъ. КIэлэ къопцIэ гуахь цIыкIур итеплъэкIи, иIо­кIэ-шIыкIэхэмкIи тиIоф­шIэгъугъэу ЕмтIылъ Нурбый фэдгъэдагъ. Охътабэ темышIэу Дамир иапэрэ тхыгъэ гъэзетым къы­фигъэхьыгъ. Ар зэ­рэщытэу къыхэтэутыжьы. ТапэкIэ «Адыгэ макъэм» щы­лэ­жьэщт журналист ныбжьыкIэхэм ащыщ хъунэу етэIуалIэ: «Сэ сцIэр Дамир, Талъэкъомэ сащыщ, илъэс 13 сыныбжь. Сятэу Талъэкъо Зауркъан Инвер ыкъор Афган заом хэлэжьагъ. Сянэ Талъэкъо Свет Мосэ ыпхъу. Сшынахьыжъэу Тимуррэ сшыпхъунахьыжъэу Фатимэрэ сиIэх. Тэхъу­тэмыкъое районым ит къуаджэу Щынджые сыкъыщыхъугъ. Сичылэ ныбжь ин зиIэ псэупIэмэ ащыщ. Ар къэзгъэ­дэхагъэмэ ащыщэу сэлъытэ сятэшэу Талъэкъо Пщышъэукъан Инвер ыкъор. «Къуаджэм ицIыф гъэшIуагъ» зыфиIорэ щытхъуцIэр ащ къылэжьыгъ. Сэ ар сищысэтехыпI. Щынджые гурыт еджапIэм ия 7-рэ класс сис. Сыкъызщытхъужьынэу сикIа­сэп, арау дэгъоу седжэ. Сиеджэни къыщымыкIэу спортым сыпылъ. СпортымкIэ зэнэкъокъухэм хагъэунэфыкIырэ чIыпIэхэр къащысэхьых. ЕджапIэм, районым, республикэм ащызэхащэрэ зэнэкъокъухэм сахэлажьэ. Ау анахь сызфэщагъэр адыгабзэм изэгъэшIэн. СэшIэ адыгабзэр зэбгъэшIэныр зэрэ­къиныр. Синыдэлъфыбзэ шIу сэзгъэлъэ­гъурэмэ ащыщ сикIэлэегъаджэу Мэзыу­жьэкъо Шамхъан Даутэ ыпхъур. Сы­бзэ сикIас, сшIодах, сэгъэлъапIэ. Сыадыг зыIорэм ыбзэ идэхагъэ ышIэн, рыгущыIэн фае. Непэ адыгабзэкIэ гущыIэрэр нахь макIэ мэхъу. Зыгъэпсэфыгъо уахътэ сиIэ зыхъукIэ адыгэ тхакIомэ ятхылъмэ сяджэ. «Адыгабзэр зэтэгъашIэ» зыфиIорэ зэнэкъокъум апэрэ чIыпIэр къыщыс­хьыгъ. Тэ непэ анахь Iофэу тызпылъын фаер тиныдэлъфыбзэ зэрэтымгъэкIодыщтыр ары. Сэщ фэдэу адыгабзэр зэзгъашIэу гурыт еджапIэмэ ачIэсхэр ащ икъэу­хъумэн пылъынхэ фае. Ар тэ тынап!»

Талъэкъо Дамир фэдэу къытфэтхагъ Щынджые гурыт еджапIэм ия 10-рэ класс икIэлэеджакIоу Къушъэкъо Альбинэ. Ар еджапIэм щызэхэщэгъэ волонтер купым хэт, Iофтхьэбзэ зэфэшъхьафмэ ахэлажьэ. Ащ фэгъэхьыгъ иапэрэ тхыгъэу «Адыгэ макъэм» къыгъэхьыгъэри:

«СэркIэ волонтерым мэхьанэшхо иI, ар гущыIэ къодыеу щытэп, гукIэгъуныгъэрэ гуфэбэныгъэрэ зыхэлъ цIыф. «ШIу шIи псым хадз» зыфаIорэм фэд. УгукIэ урыразэу шIу афэпшIэн фае цIыфхэм. Ащ дакIоу, псэу­шъхьэхэм ыкIи нэмыкIхэми уишIуагъэ ябгъэкIын фае. Сэри волонтермэ сащыщ. ЗэкIэмэ анахь лъэшэу мы Iофтхьабзэр зезыхьэхэрэр «Движение первых» зыфиIорэм хэтхэр ары. Сэ апэрэу ащ сыхэлэжьагъ. НэIуасэ сызфэхъугъагъэм щегъэжьагъэу нахь куоу зэсэгъа­шIэ, нахь лъэшэуи сыхэлажьэ. Волонтерэу чIыпIэ заулэмэ сащэлажьэ. Джащ фэдэу тызэгъусэу зэнэкъокъумэ, куп зэхахьэмэ тахэлажьэ. Волонтерым ишъыпкъэу иIофшIэн ыгъэ­цэкIэн фае. Мары Адыгеим волонтерыбэ ис. Ахэм афэдэу цIыфмэ сишIуагъэ язгъэкIыным сыпылъ: Iофтхьабзэхэм, зэнэкъо­къухэм, зэхахьэхэм сахэлажьэ. АщкIэ зишIогъэшхо къакIорэр тикIэлэегъаджэу, кураторэу Трахъо Аминэт Анзаур ыпхъур ары. Джащ фэдэ Iофтхьэбзэ гъэшIэгъонхэр тиеджапIэ щырекIокIых. Лъэшэу тынаIэ атетэу, тишIуагъэ ятэгъэкIы зыныбжь хэкIотагъэхэм, заом хэлэжьагъэхэм, нэмыкIхэм. Зэрэс­лъытэрэмкIэ, волонтерыр цIэ къодыеп, ащ мэхьанэшхо иI, чIыпIэ къин ифагъэхэм тадэIэпыIэ. Волонтерым ыгу зэIухыгъ, къабзэ, цIыфхэр икIасэх. Джары волонтерым ышIэрэр. БэшIагъэп волонтер сызыхъугъэр, ау зэзгъэшIагъэр, къызгурыIуагъэр макIэп. Волонтер сыхъуныр сэ сыгукIэ къыхэс­хыгъ. Мыщ цIыфхэм ишIуагъэ зэраригъэкIырэм дакIоу, Iоф дэгъухэр зепхьанхэу чIыпIэ урегъэуцо. Волонтерым тегъасэ цIыфхэм уасэрэ лъытэныгъэрэ афэтшIынэу ыкIи зэнэкъокъухэм, Iофтхьабзэхэм тахэлэжьэнымкIэ тишIэныгъэмэ ахэтэгъа­хъо. СикIэлэцIыкIугъом щегъэ­жьагъэу сыфэягъ цIыфхэм са­дэIэпыIэнэу, сишIуагъэ язгъэ­кIы­нэу, шIу афэсшIэнэу. А уахъ­тэр къэсыгъ. Мэзэ заулэкIэ узэкIэIэбэжьмэ «Движение первых» зыфиIорэм хэтхэм Мыекъуапэ сащыIукIэгъагъ. Ти­еджапIэ щеджэрэ кIэлэеджа­кIохэр сигъусэхэу ащ иапэрэ фестиваль тыхэлэжьагъ. НэIуасэ тыфэхъугъ республикэм иво­лонтермэ япащэу Ованес Шекерьянц. Ащ къэбар гъэшIэ­гъонхэр къытфиIотагъэх, упчIэу еттыгъэхэм джэуапхэр къаритыжьыгъэх.