Мэз дахэм орэд къеIо… Нани тати къэлэдэс, Паркым тэкIо, цIыфыр диз. Хъэрен заулэм сарэтIысхьэ, СыкъечъэкIы… Джыри тэкIо… Гъогу занкIэм тыщылъэс, Татэ къеIо: «Чъыг орэдхэм тядэIунэу чыжьэу тэкIо!» Сымыпшъынэу пшъэм сыдэс, Тызнэсыгъэр къэлэ мэз… Лъэой лъагъэр тачIэгъ хъугъэ, Мыекъуапэ тынэ кIиз, Хъурэябзэу зытэплъыхьэ… Мэзы дахэм чъыгыр хиз. Жьаум тыгъэр егъэбылъы, Жьыр кIелъэсы, тIэкIу мэсысы… Нанэ сIапэ къыубытыгъэу Джыри тэкIо… «ДаIолъ», — еIо. Чъыг бырабэм орэд къеIо! Сыдэплъые — тхьапэр пиз, Къыхэмыщэу, цIыкIужъыеу Чъыгы шъхьапэм бзыур пыс. Тыдэ хъугъэха Iалъэ цIыкIухэр?.. Пшъэшъэ хъупхъэу нэшхо цIыкIум Чанэу ешIэ иIоф Iахь. Жьэу къэтэджы, псынкIэу машхэ… Сурэт ешIы, дахэу матхэ… Къежэ – къежэ иеджапIэ, Тхылъэу иIэр ыкIыб илъ. Янэ реIо пшъэшъэжъыем: «Щагур чъыIэ, пщымыгъупшэу Iалъэ фыжьхэр зыпылъхь!» Ымыгъотэу зыкъеплъыхьэ… «Тэ щыI?» — еIошъ, къыкIащтэ… Джыбэм илъэп, Iанэм те— лъэп — Нэшхо цIыкIур янэ къеплъы… КъытепшыкIы ышъхьашыгу, ПаIом илъыр Iалъэ цIыкIу. Нани, тати шIу сэлъэгъу, Ащ къысаIорэм седэIу. ЗэкIэ – зэкIэ афэсшIэн, «Пшъэшъэ хъупхъ» язгъэIон. Татэ хъупхъэкIэ къысаджэ, Къыздэджэгу, сэ сыбзаджэп… Къэлэ гупчэр тэ тикIас, КъэткIухьаным тыфэIаз. Тхьаркъо фыжьхэм ауж тит, Къэсчъыхьащтмэ, сышъхьафит. «Хэт нахь псынкIэр?» — еIо татэ, Тхьаркъом ыпэ сэ селъадэ, Зегъэгусэшъ, IобыбыкIы, Чъэрэр лъэшы, быбрэр псын­кIэ… Чанэу-чанэу сытекIуагъ, Татэ Iэгу къысфытеуагъ!   Чэмыр мэбыу, атакъэр маIо, Хьэхэр мэхьакъух, чэтхэр мэкъакъэх, Iоирэр мэлы, ядэIурэр сэры. Нанэ сыкIыгъоу ахэм сахэт, Чылэ орэдым ымакъэ джащ фэд, Ащ кIэдэIукIырэр ощ фэд, сэщ фэд…   Тыгъэр къохьажьы, Мазэр къыкъокIы… Чъыер къысэкIоу Силъ нанэ ыкокIы. Зы жъуагъо, жъогъуитIоу Ошъогур сэлъытэ… Мазэр къысэплъы, Нанэ гу лъетэ… «Къэлъыт, сикIал, — еIо… Жъогъо зырызэу Олъытэфэ зэкIэ, Мазэр итыщт. МэфакIэр къызыскIэ, КъыгъэшIэтынэу Тыгъэ нэфынэр къэущыжьыщт».   Хэт нахь шIу ылъэгъурэр тыгъэм? Оры, сэIо, синэфын. Укъэущы — тыгъэр къепсы, Огум ит ар, узщылъэсым. Мэфэ реным къегъэнэфы, Пшъырэп, гъолъырэп оджэгуфэ. Узэрэпшъэу мэкIосэжьы, Нэфыр пшъыгъэшъ, мэчъыежьы…   Нэфынэ ишIуфаIу Нэфынэ цIыкIоу, типшъэшъэ дах, Дунаим итхъагъо о пфыхэтэх! Тыгъэм ифабэ къыпшъхьащэрэт. ЧIыгушхом идахэ уигъашIэ хэрэт. Тыбгъэгушхонэу укъытфэхъугъ, ТыбгъэгушIоным тигугъэ еп­хыгъ. Типсэу – нэфынэ, шIу утэлъэгъу, ШIур пфэбэгъонэу Тхьэм тыпфелъэIу! Уятэ бгъэгушIоу, уянэ бгъэлъа­пIэу, Нэнэжъхэр бгъашIоу, татэ уедэIоу, Плъытэу нахьыжъхэр бэгъашIэ утфэхъу! Нурэр пшъхьарытэу, хъярыр уикIуапIэу, УнасыпышIоу Тхьэм уегъэ­псэу!!! Бзыу, бзыу, бзыужъый, Мэкъэ инэу, лъэпэжъый! Чъыгы куамэм утетIысхьэ, Орэд макъэм зыкъеIэт. УцIыкIу дэдэу укъыхэмыщми, Чъыгым къеIо уиорэд. Бзыу, бзыу, бзыужъый, Мэкъэ инэу, лъэпэжъый! Сыплъежьагъ усыубытынэу УсшIоцIыкIоу, зысшIоинэу. Бзыу, бзыу, бзыужъый, Иныр сэры, о ужъый. Зи сымыIоу устIупщыгъ, Зыппхъуати убыбыгъ. УсшIоцIыкIути, сыгу огъугъ. Бзыу, бзыу, бзыужъый, Мэкъэ чанэу, лъэпэжъый! СыпкIэхьанэу лъэшэу сэчъэ, ЗэIуохы ошъогупчъэр. Дахэу уесы гъэтхэ огум, Шхын остынэу из сIэгу. Бзыу, бзыу, лъэпэжъый Сэ сыини, бзыужъый!