Спорт гимнастикэмкIэ Къыблэ ыкIи Темыр-Кавказ федеральнэ шъолъырхэм, Донецкэ ыкIи Луганскэ народнэ республикэхэм ячем­пионатрэ япервенствэрэ къалэу Ростов-на-Дону щыкIуагъэх. Ахэм нэбгыри 120-рэ ахэлэжьагъ. Мыекъуапэ испорт еджапIэу N 2-р къэзыгъэлъэгъогъэ гимнастхэм ащыщым гъэхъэгъэшIухэр ышIынхэ фызэшIокIыгъ. Адыгеим ыцIэкIэ зэнэкъокъухэм защаушэтыгъ спортсмен ныбжьыкIэхэу Иван Школа, Денис Тудиряковым, Тимур Раджабовым, Давид Мелконян, Иван Гладковым. Унэе программэм къыдыхэлъытэгъэ зэнэкъо­къухэм дэгъоу закъыщигъэлъэгъуагъ ыкIи джэрз медалитIу къащихьыгъ спортым имастер хъунымкIэ кандидатэу Иван Школа. Джащ фэдэу спортым имастер хъунхэмкIэ кандидатхэм япрограммэкIэ адрэ тиспортсменхэми гъэхъэгъэ гъэнэфагъэхэр ашIыгъэх. Тиспортсмен ныбжьыкIэхэр зыгъасэхэрэр Вячеслав Косныхрэ Людмила Поповамрэ.