КIэлэ ыкIи пшъэшъэ ныбжьыкIэхэм азы­фагу кикбоксингымкIэ Адыгэ Республикэм изэIухыгъэ зэнэкъокъу мэзаем и 9 — 10-м Мыекъуапэ щыкIуагъ. Урысыем ишъолъыр зэфэ­шъхьафхэм къарыкIыгъэ спорт­смен 200 фэдизмэ кикбоксингым илъэныкъохэу «К-1», «фулл-контакт» ыкIи «лайт-контакт» зыфиIохэрэм защаушэтыгъ. КIэух зэ­фэхьысыжьэу ашIыгъэхэр «Адыгэ макъэм» зэригъэшIагъ. Адыгэ Республикэм кикбок­сингымкIэ и Федерацие игъэцэ­кIэкIо пащэу, кикбоксингымкIэ спортым изаслуженнэ мастерэу Хэжъ Щамилэ къызэриIуагъэмкIэ, зэнэкъокъур зэрифэшъуашэу ре­кIокIыгъ, шъхьадж къыщэчырэм ыкIи ыныбжьыкIэ купэу зыхахьэ­рэм ялъытыгъэу текIоныгъэ къыдэзыхыгъэхэр къэнэфагъэх. — Мы зэнэкъокъум къащыхэщыгъэ спортсменхэм Адыгеим ихэшыпыкIыгъэ командэ къагъэ­псыгъ. Ахэр джы республикэм ыцIэкIэ Къыблэ федеральнэ шъо­лъырым ичемпионатэу ыкIи ипер­венствэу мэзаем и 29-м къыщегъэжьагъэу гъэтхапэм и 3-м нэс Волгоград щыкIощтым хэлэжьэщтых, — хигъэунэфыкIыгъ Хэжъ Щамилэ. Мы зэIухыгъэ зэнэкъокъум къа­щыхэщыгъэр апшъэрэ IэпэIэсэныгъэм иеджапIэу «Чемпион» зыфиIорэм икомандэу Яблоновскэм щыIэр ары. Тренерыр Блэ­нэгъэпцIэ Алый. Мы командэм щыщхэу текIоныгъэр къыдэзыхыгъэхэм ахэт Урысыем щэгъогогъо ичемпионэу Даниил Сапуновыр, Адыгеим ичемпион щытхъуцIэр мы зэнэкъокъуми ащ къыщи­гъэшъыпкъэжьыгъ. Джащ фэдэу Урысые зэнэкъокъухэм къащыхэщыгъэ Алексей Куприяновыр зэпэуцужь пхъашэм щатекIуагъ. Ащ къыкIэлъэкIо «Академия кикбоксинга «Кросс» зыфиIорэм икомандэ. Тренерыр — Ренат Симонов. Мы командэм хэт нэбгыри 6-мэ апэрэ чIыпIэр къа­хьыгъ. КомандэхэмкIэ ящэнэрэ чIыпIэр зыфагъэшъошагъэр Мые­къуапэ кикбоксингымкIэ иеджапIэу «Number One» зыфиIорэм испортсменхэр ары. Тренерхэр Борсэ Астемыр ыкIи Артем Добросельскэр. Мы командэм щыщ­хэу текIоныгъэм фэбэнэгъэнымкIэ ыкIи техникэ дэгъу къэгъэ­лъэ­гъогъэнымкIэ къахагъэщыгъэ­хэр Гъубжьэкъо Рэщыдэрэ Иван Ме­денцевымрэ. ЗэIухыгъэ зэнэкъокъум хэлэ­жьагъэх Бжыхьэкъоежъым, Тэхъу­тэмыкъуае, Яблоновскэм къа­рыкIыгъэ командэхэр ыкIи ахэм чIыпIэ гъэнэфагъэхэр аубытыгъэх. Джащ фэдэу апэрэу мыщ къекIолIагъэх Шэуджэн районым икомандэу спорт лъэпкъэу «Ушу» зыфиIорэм зыфэзыгъасэхэрэр. Мыхэми IэпэIэсэныгъэ дэгъу къа­гъэлъэгъуагъ. Тренерыр — Даур Хьамид. Къахэщыгъэр Тюльпэрэ Дамир. Волгоград щыкIощт зэнэкъо­къум Адыгеим ихэшыпыкIыгъэ командэ текIоныгъэр къыщыди­хынэу фэтэIо. Iэшъынэ Сусан.