[caption id="attachment_145754" align="aligncenter" width="800"] Артур Лаутеншлегер[/caption] Чэужъ Рустам Красногвардейскэ районым унэе мэкъумэщ хъызмэтшIапIэ щызгъэпсы­гъэхэм ащыщ, цумпэ къегъэкIы. Ащ гущыIэгъу тызыфэхъум къызэриIуа­гъэмкIэ, гектари 4 елэжьы, чIыгур ежь иунай. ИлъэсипшIым ехъугъэу чIыгу­лэжьыным ыуж ит, нахьыпэкIэ помидор, къэбжъые, щыбжьый, нэмыкI хэтэрыкIхэм апылъыгъ. Илъэс заулэ хъугъэ цумпэр къызигъэкIырэр. Ащ нахь федэ къыхьэу ары фермерым къызэриIуагъэр. 2021-рэ илъэсым къэралыгъо IэпыIэгъур зыгъэфедагъэхэм ар ащыщ. Бизнес цIыкIум ыкIи гурытым IэпыIэгъу афэхъу­гъэным фэгъэхьыгъэ программэм къадыхэлъытагъэу грантэу сомэ миллиони 2-м ехъу къыратыгъ. — Ар лъэшэу къытшъхьэпагъ, — ыIуагъ ащ. — Тхылъэу ищыкIагъэхэм ягъэпсыни Iофыбэ къыпыкIыгъэп, мэкъу­мэщ хъызмэтымкIэ район гъэIорышIапIэм испециалистхэр къыздеIагъэх. Программэм ахъщэу зэкIэмкIи уищыкIагъэм ипроцент гъэнэфагъэ ори пIэкIэлъынэу къыдэлъытагъ. Арышъ, ар зэIубгъэкIэшъумэ ухэлэжьэн фаеу сэлъытэ. Ахъщэу къысфэкIуагъэмрэ сэ сиIагъэмрэ зэхэзгъахъохи гъэIэгъэ пкъыгъохэр зыхэсшIы­кIыщтхэр, псы зэрэкIэзгъэхъощт сис­темэм ищыкIагъэхэм ащыщхэр, рассадэхэр къэсщэфыгъэх. Сэ симылъку закъокIэ а зэпстэур зэзгъэгъотыным охътабэ ыхьыщтыгъагъ. Рустам селоу Красногвардейскэм щэпсэу, ау ичIыгухэр селоу Верхненазоровым щыIэх. НахьыпэкIэ жьэу къэ­хъурэ цумпэ лъэпкъхэм нахьыбэу ауж итыгъ. Ау ахэр зычIэт гъэIагъэхэр гъэтхэ жьыбгъэхэм ащыухъумэгъуаеу ары фермерым къызэриIорэр. Ащ фэшI «гурыткIэ» заджэхэу зыпарэми чIэмытхэу, шъофым къыщыкIыхэрэм нахь зафигъэзэжьыгъ. Цумпэ лъэпкъ дэгъоу, лэжьыгъэ бэгъуагъэ къэзытыщтхэр егъэтIысхьэх. КъызэриIуагъэмкIэ, илъэсым гъогогъу 11 — 12-рэ къаугъои, гъогогъу 16-рэ къыкIа­чыгъэуи къыхэкIыгъ. ЧIыгоу иIэм ызыныкъом цумпэр къыщегъэкIы, адрэ ныкъом зырегъэгъэпсэфы. Мыгъэ къыз­кIачыщт цумпэм ищыкIэгъэ IофшIэнхэр бжыхьэу кIуагъэм рашIылIагъэх. Ом иягъэ къямыкIымэ, лэжьыгъэ дэгъу къытынэу щэгугъы. Красногвардейскэ районым цумпэ зэфэшъхьафхэм якъэгъэкIын лъэшэу зыщеушъомбгъу. Ащ фэшI зэхэубытэгъэ щэн шIыкIэм тетэу зыщыIуагъэкIырэ бэдзэршIыпIэ агъэпсыгъ. Рустам къызэриIуагъэмкIэ, ары нахьыбэр зыщыIуи­гъэкIырэр, ау ащ имызакъоу, нэмыкI шъолъырхэм къарыкIырэ щэфакIохэри иIэх, илъэс къэс ахэр ицумпэ къылъэкIох. Шъыпкъэ, ащи къин Iахь хэлъ, ар уасэхэм япхыгъ. Арэу щытми, къыгъэкIы­гъэр федэ хэлъэу IуигъэкIын елъэкIы. Цумпэу къыгъэкIырэм джыри хигъэхъон гухэлъ зэриIэм ар къеушыхьаты. Шъугу къэдгъэкIыжьын, Рустам зыхэ­лэжьэгъэ программэр УФ-м и Президентэу Владимир Путиныр кIэщакIо зыфэхъугъэ лъэпкъ проектэу «Бизнес цIыкIур ыкIи гурытыр, предпринимательхэр кIэщакIо зыфэхъугъэхэм япхырыщынкIэ адеIэгъэныр» зыфиIорэм къыдыхэлъытагъэхэм ащыщ. ХЪУТ Нэфсэт.