Зэнэкъокъур зэфахьысыжьыгъ
Я XII-рэ къэлэ зэнэкъокъоу «АРТ-елка — 2024» зыфиIорэм текIоныгъэр къыщыдэзыхыгъэхэм культурэм и Унэу «Гигантым» блэкIыгъэ бэрэскэшхом шIухьафтынхэр щаратыжьыгъэх.
[caption id="attachment_145746" align="aligncenter" width="800"] Александра Балабась[/caption]
Зэнэкъокъур илъэс 12 хъугъэу республикэ гупчэм щызэхащэ, илъэс къэс ащ хэлажьэхэрэм япчъагъэ нахьыбэ зэрэхъурэм дакIоу яIэпэIэсэныгъи хэхъо. Муниципальнэ образованиеу «Къалэу Мыекъуапэ» культурэмкIэ и ГъэIорышIапIэ мы Iофтхьабзэм изэхэщакIу. — Адыгеимрэ Краснодар краимрэ якIэлэцIыкIу IыгъыпIэ 37-мэ ыкIи яеджэпIэ 28-мэ ялIыкIохэр мы илъэсым зэнэкъокъум хэлэжьагъэх. Ахэм ащыщых къалэу Мыекъуапэ, Мыекъопэ, Шэуджэн, Джэджэ районхэм, джащ фэдэу Краснодар краим и Шытхьэлэ район къарыкIыгъэхэр. Щылэ мазэм и 3-м къыщыублагъэу и 8-м нэс культурэм и Унэу «Гигантым» зышIоигъохэм къэгъэлъэгъуапIэм нэIуасэ зыфашIын амал яIагъ. Нэбгырэ 3000-м ехъу мэфэкI мафэхэм ащ къекIолIэгъагъ, — къыщаIуагъ культурэмкIэ ГъэIорышIапIэм. — Лъэныкъо зэфэшъхьафхэмкIэ яIофшIагъэхэр мыщ къырахьылIагъэх: «Елочка — символ года», «Елочка — символ города», «Елочка в национальном стиле», «Елочка — Гигант» джащ фэдэу кIэу тIу къахэхьагъ: «Елочка — сказка» (лъэпкъ пшысэхэм атехыгъэхэу щытых), «Киномульт и Елка» зыфиIохэрэр. Зэнэкъокъум пшъэрылъ шъхьаIэу иIэр унэгъо творчествэм кIэлэцIыкIухэри, янэ-ятэхэри къыхэщэгъэнхэр, лъэпкъ пшысэхэм, шэн-хабзэхэм нэIуасэ афэшIыгъэнхэр ары. «Арт-Елка – 2024» зыфиIорэмкIэ текIоныгъэр къыдэзыхыгъэр Федор Втюриныр ары. Ар лицееу N 19-м ия 2-рэ класс щеджэ. «Ретро Елочка» — джары зэреджагъэр зэнэкъокъум къырихьылIэгъэ IофшIагъэм. Федор янэжъ къызэрэдеIагъэри мыщ къыщиIуагъ. Апэрэ илъэсэп шъэожъыер зэнэкъокъум зыхэлажьэрэр, къихьащт илъэсми текIоныгъэм фэбэнэн мурад иI. Лъэныкъоу «ЦIыфэу къекIолIагъэхэм яшIухьафтын» зыфиIорэмкIэ цIыфхэм ямэкъэтын зэхащэгъагъ, нэбгырэ 1500-рэ фэдиз ащ хэлэжьагъ. Нафэ къызэрэхъугъэмкIэ, псэупIэу Ханскэм щыщхэу София Мальцевамрэ Алина Крохинамрэ текIоныгъэр къыдахыгъ. Ахэм мысатыу организациеу «Культпросветым» ихэушъхьафыкIыгъэ шIухьафтын аратыгъ. Джащ фэдэу мысатыу организациеу «Перезвон» зыфиIорэм ишIухьафтын къафагъэшъошагъ Елизавета Кураевамрэ Владимир Дворниченкэмрэ. Унагъом и Илъэс къыпкъырыкIыхэзэ аухэсыгъэ тынэу «Унэгъо IофшIэгъэ анахь дэгъур» зыфиIорэр Дробинхэмрэ Абраменкэмхэмрэ яунагъохэм ялIыкIохэм аратыжьыгъ. Компаниеу «ЭкоЦентр» зыфиIорэмрэ пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «КубаньКредитымрэ» яхэушъхьафыкIыгъэ шIухьафтынхэр зытефагъэхэр Алиевхэу Расулрэ Алирэ, Иныхъу Назар, Матвей Ким, ахэм анэмыкIэу кIэлэцIыкIу IыгъыпIэу N 7-м ипэублэ куп хэтхэр. КультурэмкIэ къэлэ ГъэIорышIапIэм иIофышIэхэм анахьэу хагъэунэфыкIыгъэхэр «Гъунэ зимыIэ творчествэр» зыфиIорэ лъэныкъомкIэ мыщ къырахьылIэгъэ IофшIагъэхэр ары. ЗипсауныгъэкIэ пыч зиIэ кIэлэцIыкIухэм ахэр ашIыгъэх. АдыгеимкIэ гъэсэныгъэм иорганизации 10-мэ шIухьафтынхэр аратыгъэх: мыекъопэ кIэлэцIыкIу IыгъыпIэхэу NN 11-м, 18-м, 26-м, 36-м, 37-м, 42-м, псэупIэу Джаджэм дэт кIэлэцIыкIу IыгъыпIэу «Ромашкэм», дэеу зэхэзыхырэ ыкIи зылъэгъурэ кIэлэцIыкIухэу Адыгэ республикэ еджэпIэ-интернатым ачIэсхэм, Мыекъопэ районымкIэ гъэсэныгъэ зыщарагъэгъотырэ гупчэу N 10-м кIохэрэм.