Къыблэм икIыгъэхэу Темыр шъолъырым «идышъэкъычIэх» хъугъэх
Къуаджэу Псыбэ щыщ спортсмен ныбжьыкIэхэм яунагъо къиныгъохэмрэ ушэтыпIэхэмрэ къызэпичыхэзэ, къызщыхъугъэхэм пэчыжьэ зэхъуми ипытагъэ къыгъэлъэгъуагъ.
[caption id="attachment_145737" align="aligncenter" width="800"] Полина Оруджовам ихъарзынэщ[/caption]
АкIэгъухэм яунагъо ищыIэныгъэ нэмыкI шъыпкъэу зэблихъунышъ, зэсагъэхэ псэукIэм текIынэу зэрэрихъухьагъэм ушъхьагъу шъхьаIэ фэхъугъэр ясабыйхэр ары. Спортым гъэхъагъэхэр щашIынхэу гугъэпIэ инхэр къэзытыхэу, дунэе, Урысые ыкIи шъолъыр зэнэкъокъубэхэм текIоныгъэхэр мызэу, мытIоу къащыдэзыхыгъэхэ Миланэ, Камилэ ыкIи Руслъан янэрэ ятэрэ ягъусэхэу Ямало-Ненецкэ автоном округым икъэлэ шъхьаIэу Надым кIожьыгъэх. КIэлэцIыкIухэр зыгъасэщтыгъэхэ Оруджов Русланрэ Полинэрэ зэкощыжьыхэм, ахэм ауж ихьанхэу хъугъэ. Тещыныхьэхэзэ кIожьыгъагъэх, ау кIэгъожьыгъэхэп. — Сишъхьэгъусэ спортым гъэхъагъэхэр щишIыгъэх, джы самбэмрэ дзюдомрэкIэ тренер. НыбжьыкIэхэм Iоф адэпшIэнымкIэ амал инхэр Надым къыщыпагъохыгъагъэх. Ар блэптIупщы хъунэу щытыгъэп, — къыфиIотагъ «Адыгэ макъэм» Полина Оруджовам. — Зэрэунагъоу тыкIожьыгъ. Тишъао- хэу Хьадж-Муратэрэ Расулрэ яцIыкIугъом къыщегъэжьагъэу бэнэным пылъых, гъэхъагъэхэри яIэх. Полинэ къызэрыхъухьэгъэ унагъом ылъэкъуацIэу БелоусовкIэ спортым идунай щашIэ. ТIуапсэ щыщ тренер цIэрыIоу Нэгъуцу Джанболэт ыгъэсагъэхэм ащыщ, дунэе класс зиIэ тренер, къэралыгъом ихэшыпыкIыгъэ командэ хэт, Урысыем ичемпионатхэм апэрэ чIыпIэхэр мызэу, мытIоу къащихьыгъэх, дунаим ыкIи Европэм якубокхэр къизыхыгъэхэм ащыщ. ЧIыопсым псынкIэу есагъэхэу, ар зэрэзэблахъугъэр къагурыIонэуи игъо имыфагъэхэу ыIуагъ тренерым. ТIопсэ районым километрэ миным ехъукIэ пэчыжьэ шъолъырым сыхьатхэри, псэукIэ амалхэри щынэмыкIых. ЩыIэныгъэр икIэрыкIэу рагъэжьэжьын фаеу хъугъэ. Апэрэ уахътэм гумэкIыгъохэр щыIагъэх. ЧIыпIакIэм зэрэщыхъущтхэм ыгъапэщтыгъэх. КIэлэцIыкIухэр ары анахьэу зыфэгумэкIыщтыгъэхэр. — БгъэшIэгъонэу щыт охътэ кIэкIым зэкIэри зэрэзэпыфагъэр, — еIо Полинэ. — Спорт еджапIэу, «Лидер» ыцIэр, тезгъэблэгъагъэм иколлектив дэгъоу къытпэгъокIыгъ. Охътабэ темышIэу гъэхъагъэхэри къызэкIэлъыкIуагъэх. СпортымкIэ мастер хъунымкIэ кандидатэу, илъэс 18-м зыныбжь шIомыкIыгъэхэм я Урысые зэнэкъокъу, кIэлэеджакIохэм яспартакиадэхэм, дунэе зэнэкъокъухэм апэрэ чIыпIэхэр мызэу, мытIоу къащыдэзыхыгъэ Миланэ Ямало-Ненецкэ автоном шъолъырым дзюдомкIэ щызэхащэгъэ зэнэкъокъум текIоныгъэр къыщыдихыгъ, нахьыкIэхэм якуп зыкъыщызыгъэлъэгъогъэхэ илъэс 13 зыныбжь Руслъанрэ илъэси 10 зыныбжь Камилэрэ Надымскэ районым самбэмкIэ ичемпион хъугъэх. АкIэгъу унагъом испортсмен ныбжьыкIэхэр илъэсрэ ныкъорэу мы шъолъырым зыщыIэхэм медаль шъэныкъом ехъу къыщахьынэу игъо ифагъэх. Анахьыбэу гъэхъагъэхэр зиIэхэр Милан. Ар дзюдомкIэ Урысыем иныбжьыкIэ хэшыпыкIыгъэ командэ хэхьагъ. 2023-рэ илъэсым тичIыпIэгъу пшъэшъэ IэпэIасэр «Надымскэ районым испортсмен анахь дэгъу» хъугъэ, щытхъу тамыгъэу «Общественное признание» зыфиIорэр къыфагъэшъошагъ. Ащ итренерэу Полинэ «Надымскэ районым итренер анахь дэгъу» хъугъэ. НЫБЭ Анзор.