ГъукIэлI Нурбый  

Бгъэшъотхылъ

Къоджэ ефэндым Сянэ гумэкIэу ТхьэлъэIу тхылъэу Къыригъэтхыгъэр Шъор ещэкIыгъэу Сыбгъашъо телъэу, Итыр сымышIэу КъыздесэхьакIы.

МакIох илъэсхэр ЗэхэсымышIэу, НэмыкI шIэныгъэм Сыгу естыгъэу. ГъашIэм ишъоны Сырихьыжьагъэу, Сибгъэшъотхылъи Спшъэ исхыжьыгъэу. Гугъэр кIосагъэу, Амал сылъыхъоу, ГъашIэм ижьыбгъэ Сызэридзагъэу, А бгъэшъотхылъэу Спшъэ исхыжьыгъэр Гупсэф сылъыхъоу Къэсэгъотыжьы… ГъашIэм ипкIантIэ ЫгъэшъокIыгъэу, Шъоу ещэкIыгъэр Зэхэзыжьыгъэу, Тхьэпэ хъокIыгъэм Итыр нэгъыфэу, Духьэ тхыгъэм Джы сыкъеджэжьы. «ШIункIыри нэфыри ЗэIуимыгъакIэу, Дунэе псаур ЗыгъэIорышIэрэм - Сыкъыпщыгугъэу СыкъыолъэIу: Еу щыIэ пстэуми Сащыухъум! Ахърэт мафэм ОсхьылIэжьынэу ШIоу къысхэплъхьагъэр Сыгу щыухъум… Чэщырэ шIункIым ЦIыф ымылъэгъоу Еу щызэрахьэрэм Сыщыухъум… Шхъухьэ зыгу илъи, Мыхъун зезыхьи Сыгу щэнаутыр Къырамылъхьанэу, Удыми джынэми Сащыухъум… ЦIыф тIого-бзагоми Сащыухъум». Сеплъы гупшысэм Сызэлъиштагъэу Илъэс пчъагъэм Сызыухъумагъэм. Шъо гъэкIэжьыгъэр ЕсщэкIыжьыгъэу Духьэ тхыгъэр Спшъэ исэлъхьажьы.

  Х. Т.

 Джы дунаир Лъэшэу зэIыхьагъ, Шапхъэу щыIэр Тыди зэщыкъуагъ. ШIу уилъэгъоу, Ыгуи къыпфэузэу МакIэ мы дунаим Къытенагъэр. А зэпстэури о зым Пхэмызыгъэу, ГъашIэу сиIэр Ренэу огъэлъапIэ. Хэти инэплъэгъу УщигъашIоу, Шапхъэм уитэу Ренэу къырахьакIы. Сэри сигупшысэ УхэмыкIэу, ГъашIэу уиIэр Гъунджэу къесэхьакIы.