Урысые обществэу «ШIэныгъ» зыфиIорэм и Координационнэ совет иунашъокIэ общественнэ орга­низацием изэхэсыгъо лъыплъэкIо Советым хэтыщтхэр непэ  щагъэнэфагъэх.

Зэхэсыгъор Мыекъопэ къэралыгъо технологическэ университетым щыкIуагъ. Ар зэрищагъ апшъэрэ еджапIэм иректорэу, Урысые обществэм и Адыгэ республикэ организацие ипащэу Къуижъ Саидэ.

Джырэ лъэхъаным диштэрэ организацие анахь инхэм ащыщ Урысые обществэу «ШIэныгъ» зыфиIорэр. УФ-м и Прези- дент къыгъэуцугъэ пшъэрылъым елъытыгъэу, мы обществэм шIэ­ныгъэ зэфэшъхьафхэмкIэ, культурэмкIэ, тарихъымкIэ, псау­ныгъэр къэухъумэгъэнымкIэ, экологиемкIэ ыкIи нэмыкI лъэныкъохэмкIэ ныбжьыкIэхэм гъэхъагъэу яIэхэр къызыща­гъэлъэгъон алъэкIыщт Iофтхьэ­бзэ зэфэшъхьафхэр зэхещэх.

2023-рэ илъэсым къыщегъэ­жьагъэу шъолъыр обществэм ыкIи ащ икъутамэхэм хэхъоныгъэ ашIыным Урысые обществэр уж ит.

Обществэу «ШIэныгъэм» игенеральнэ пащэу Георгий Буднэр онлайн шIыкIэм тетэу Iофтхьабзэм хэлэжьагъ. Iоф­шIэнэу агъэцакIэхэрэм ягугъу къышIыгъ ыкIи Адыгэ Респуб­ликэм ишъолъыр къутамэ чанэу Iоф зэришIэрэр, гъэхъагъэхэр зэриIэхэр игущыIэ къыхигъэ­щыгъ. Шъолъырхэм къащызэ­Iуахырэ лъыплъэкIо советхэм яшIуа­гъэкIэ отделениехэм яамалхэм нахь ахагъэхъон зэра­лъэкIыщтыр къыIуагъ.

ЛъыплъэкIо Советыр зэхэ­зыщагъэхэмкIэ Адыгеир хэгъэгумкIэ я 57-рэ ыкIи Къыблэ федеральнэ шъолъырымкIэ ятIонэрэ хъугъэ. Ащ ипащ АР-м и ЛIышъхьэу КъумпIыл Мурат, АР-м иминистрэхэм я Кабинет и Тхьаматэу КIэрэщэ Анзаур, АР-м и ЛIышъхьэрэ минист­рэхэм я Кабинетрэ я Адми­нистрацие ипащэу Владимир Свеженец игуадзэхэу агъэнэфагъэх.

Iофтхьабзэм хэлэжьагъэхэм АР-м и ЛIышъхьэ ыцIэкIэ Владимир Свеженец шIуфэс сэлам къарихыгъ. Адыгэ Респуб­ликэм ишъолъыр къутамэ апэрэ мафэм къыщегъэжьагъэу чанэу Iоф зэришIэрэр къыхигъэщыгъ, апэрэ пащэу иIэгъэ Ацумыжъ Казбек зэрэфэразэхэр къы-­ Iуагъ. IофшIэным джыри лъа­гъэкIотэщт.

Урысые обществэу «ШIэныгъэм» 2023-рэ илъэсым зэхищэгъэ проектхэм ыкIи Iоф-­тхьэ­бзэ зэфэшъхьафхэм чанэу ахэ­лэжьагъэхэм щытхъу тхылъхэр аратыжьыгъэх.

ДЕЛЭКЪО Анет. Сурэтхэр Iэшъынэ Аслъан тырихыгъэх.