Лъэпкъ проектэу «Щынэгъончъэ ыкIи шэпхъэшIухэм адиштэрэ авто­мо­биль гъогухэр» зыфиIорэм къыды­хэ­лъытагъэу Адыгэ Республикэм шъо­лъыр гъогу кило­метрэ 43-рэ мыгъэ щагъэцэкIэжьыщт.

[caption id="attachment_144951" align="aligncenter" width="800"] А. Гусев[/caption]

Гъогоу мы илъэсым агъэцэкIэжьыщтхэр зэкIэ 2025-рэ илъэсымкIэ агъэнэфэгъагъэхэм ащыщых. Ыпэ ишъыхэзэ Iоф­шIэнхэр зэрашIэхэрэм ишIуа­гъэкIэ шъолъыр автомобиль гъогухэм язытет анахь шэпхъэ­шIухэм адиштэхэ хъугъэ, гъогушIхэм ар щытхъукIэ афэ-­ плъэ­гъун плъэкIыщт.

Адыгеяавтодорым иIофышIэ­хэм къызэрэхагъэщырэмкIэ, агъэ­цэкIэжьыщт гъогу Iахьхэр агъэнэфэгъахэх. анах­ьэу фыкъогъэ чIыпIэхэр ары къыхахыгъэхэр. Джащ фэ­дэу цIыфхэм ялъэIухэри, уплъэ­кIокIо къулыкъухэм къафагъэ­хьыгъэхэри, гъэцэкIэжьын пIа­лъэу къэсыгъэ­хэри къыдалъытагъэх.

Псэолъэ 20-у мы илъэсым агъэцэкIэжьынэу агъэнэфагъэ­хэм къахеубытэх Джэджэ райо­ным игъунапкъэкIэ дзыгъэ ­гъогу IахьиплI, Шэуджэн ыкIи Кощ­хьэблэ районхэм ягъу­напкъэкIэ щыIэ гъогу Iахьищ, Теуцожь, Тэхъутэмыкъое ыкIи Красногвар­дейскэ районхэм Iахь тIурытIу ащагъэцэкIэжьыщтых, Мыекъопэ районым шапхъэм диштэу гъогу чIыпIиплI ащашIыжьыщт.

Мыекъопэ районым ит поселкэу Тульскэм екIолIэрэ шъо­лъыр гъогоу километри 7,2-рэ хъурэр ары анахь кIыхьэу гъэцэкIэжьын IофшIэнхэр зыщы­зэхащэщтхэр. Я 2-рэ километрэм къыщегъэжьагъэу я 10-м нэсырэ гъогур ары а IофшIэнхэр зыщыкIощтхэр.

Къыхэгъэщыгъэн фае мы гъо­гум мэхьанэу иIэр — район гупчэм ар зэрекIуалIэрэм, поселкэу Тульскэм иурамэу Лениным ыцIэ зыхьырэм щыщ Iахьыр къызэрэдиубытырэм ямызакъоу, а гъогум къекIо­лIэжьы поселкэхэу Удобнэмрэ Совхознэмрэ къадэкIырэ гъогухэр.

«Къоджэ псэупIэхэм хэхъоныгъэ ягъэшIыгъэныр» зыфиIорэ федеральнэ программэмкIэ район сымэджэщым екIолIэрэ гъогур гъэрекIо зэ­рагъэцэкIэ­жьыгъэр къыдэп­лъытэмэ, гъогушIмэ ягухэлъ къыбгурэIо — шэпхъэшIумэ адиштэрэ гъогухэм­кIэ район гупчэм исоциальнэ псэуалъэхэр зэрапхых.

А чIыпIэр гъэцэкIэжьыгъэным сомэ миллиони 170-рэ пэ­Iуагъэхьащт, зэкIэмкIи респуб­ликэм ишъолъыр гъогухэм апае федеральнэ гупчэм сомэ миллион 996-рэ къетIупщы.

Мы гъогухэм ягъэцэкIэжьынкIэ зэнэкъокъу Iофыгъохэр джы­рэ уахътэм рагъэкIокIых, ахэр зэраухыгъэм лъыпытэу под­ряднэ организациехэм Iоф­шIэнхэр рагъэжьэщтых.