Проект гъэшIэгъонхэм ягъэпсын зыфагъасэ
Мыекъопэ къэралыгъо технологическэ университетым щызэхащэгъэ Iофтхьабзэу «Точка кипения» зыфиIорэм Урысыем ишъолъыри 5-мэ яныбжьыкIэхэр хэлэжьагъэх. Ахэр Адыгеим, Пермскэ краим, Москва, Ростов ыкIи Иркутскэ хэкухэм къарыкIыгъэх.
[caption id="attachment_144947" align="aligncenter" width="800"] МКъТУ[/caption]
НыбжьыкIэ проектхэмкIэ Урысые зэнэкъокъоу «Воплоти свою мечту» зыфиIорэм изэхэщэкIо комитет хэтхэм «Медиамастерская. Создаем яркий проект» зыфиIорэ мастер-классыр зэхащагъ. Ащ хэлэжьагъэх ныбжьыкIэ купхэр. КIэлэеджакIохэм, студентхэм ыкIи кIэлэегъэджэ-гъэсакIохэм яшIэныгъэхэм ахагъэхъуагъ.
Iофтхьабзэр зэрищагъ «Национальная технологическая инициатива» зыфиIорэ гупчэм иэкспертэу, социальнэ ыкIи медиапроектхэм яавторэу, Краснодар краимкIэ стратегическэ инициативэхэмкIэ Агентствэм иобщественнэ пащэу Антон Артамкиным. Анахьэу унаIэ зытетын фаехэр кIэлэеджакIохэм ыкIи студентхэм къафаIотагъэх, проект гъэшIэгъонхэр къызыдырахыщтхэр, хэукъоныгъэхэр зэрэхамышIыхьащтхэр, ащкIэ бгъэфедэн плъэкIыщтхэр къафаIотагъэх. Джащ фэдэу опыт зиIэ командэхэр щысэ къафахьыгъэх.
[caption id="attachment_144948" align="aligncenter" width="800"]
МКъТУ[/caption]
Антон Артамкиным мы зэнэкъокъум ыуж ныбжьыкIэхэр зыхэлэжьэнхэ алъэкIыщтхэр къафиIотагъэх. Ахэм ащыщ форумэу «Сильные идеи для нового времени» зыфиIорэр. МаркетингымкIэ, сервисымкIэ, зекIонымкIэ доцентэу, «Точка кипения» зыфиIорэм ипрограммнэ пащэу Светлана Новиковар ныбжьыкIэхэм гущыIэгъу афэхъугъ.
Шъугу къэдгъэкIыжьын, «Воплоти свою мечту» зыфиIорэ зэнэкъокъум хэлажьэ зышIоигъохэм щылэ мазэм и 31-м нэс ялъэIу тхылъхэр зэхэщэкIо комитетым IэкIагъэхьан фае. Зэнэкъокъум хэлажьэхэрэм зэкIэми сертификатхэр аратыщтых. ТекIоныгъэ ыкIи хагъэунэфыкIырэ чIыпIэ къыдэзыхыхэрэм дипломхэр афагъэшъошэщтых ыкIи Мыекъопэ къэралыгъо технологическэ университетым учIэхьанымкIэ балл тедзи 10 афыхагъэхъощт, нэмыкI апшъэрэ еджапIэхэм ежь шапхъэу яIэм елъытыгъэу балл тедзэ яIэщт.
Мыекъопэ къэралыгъо технологическэ университетым ипресс-къулыкъу.