Щынэгъончъэным фагъэIорышIэщт
Шъолъыр стратегическэ сессиеу «Навигация детства в Год семьи в России: приоритеты, направления и технологии деятельности» зыфиIорэр Мыекъуапэ щыкIуагъ.
[caption id="attachment_144938" align="aligncenter" width="800"] АР-м и Къэралыгъо автоинспекцие.[/caption]
ЗэIукIэгъум хэлэжьагъэх Адыгеим и Къэралыгъо автоинспекцие, бзылъфыгъэхэм я Союз, пIуныгъэ IофымкIэ гъэсэныгъэ организациехэм ялIыкIохэр, ныбжьыкIэ организациеу «Движение Первых» зыфиIорэм ишъолъыр къутамэ ипащэ, спорт секциехэм ятренерхэр.
Унагъор, еджапIэр ыкIи социальнэ организациехэр зэгъусэхэу зэрэзэдэлэжьэщтхэ шIыкIэхэм Iофтхьабзэм щытегущыIагъэх. ЗэрэрахъухьагъэмкIэ, пIуныгъэ IофшIэным къыдыхэлъытагъэу, гъэсэныгъэм ыкIи социальнэ IэпыIэгъум яорганизациехэм ялIыкIохэр къадеIэщтых.
Агъэнэфэгъэ Iофыгъохэм ащыщ къытегущыIагъ Адыгеим и Къэралыгъо автоинспекцие пропагандэмкIэ отделым ипащэу, полицием иподполковникэу Бзэджэжъыкъо Мурат. КIэлэцIыкIу гъогу-транспорт фыкъоныгъэу тишъолъыр къыщыхъухэрэм ушъхьагъухэу афэхъухэрэр ащ къыIотагъ. Ащ нэмыкIэу инспекторым къызэрэхигъэщыгъэмкIэ, зыныбжь имыкъугъэхэм фыкъоныгъэ зыхахыгъэ хъугъэ-шIагъэхэм янахьыбэр ны-тыхэм гъогурыкIоным ишапхъэхэр зэраукъуагъэхэм къахэкIыгъ.
Полицием иIофышIэ ипсалъэ къыщыхигъэщыгъэхэм ащыщ унэгъо тематическэ зэнэкъокъухэр зэхэщэгъэнхэр ыкIи ахэр шIокI имыIэу 2024-рэ илъэсым рагъэкIокIыщт Iофтхьабзэхэм яплан хэгъэхьагъэнхэр.
Iэшъынэ Сусан.