Мыекъуапэ шъхьафит зашIыжьыгъэр илъэс 81-рэ зэ­рэхъурэр республикэм икъэлэ шъхьаIэ щыхагъэунэфыкIыгъ.

[caption id="attachment_144900" align="aligncenter" width="800"] А. Балабась[/caption]

Мэфи 172-рэ нэмыц-фашистхэм Мыекъуапэ заIыгъым, тхьа­мыкIэгъуабэ къапыкIыгъ. Илъэс­ныкъом къыкIоцI нэбгырэ мини 4 фэдиз техакIохэм аIэкIэкIодагъ. Ащ нахьыбэжь советскэ дзэкIолIхэу ыкIи партизанхэу лагерьхэм адэкIодагъэр.

1943-рэ илъэсым щылэ мазэм и 29-м Мыекъуапэ шъхьафит ашIыжьыгъ. Ащ ыуж хьадэхэр агъэтIылъхэу, къалэр зыпкъ рагъэуцожьэу рагъэжьагъ.

Фашистхэр Мыекъуапэ зыдафыжьыгъэхэр илъэс 81-рэ зэрэхъурэм фэгъэхьыгъэ зэ­Iу­кIэр искусствэхэмкIэ Мыекъо­пэ кIэлэцIыкIу еджапIэу N 1-м тыгъуасэ щыкIуагъ. Iофтхьабзэм хэлэжьагъэх къалэм имэрэу Геннадий Митрофановыр, народнэ депутатхэм якъэлэ Совет итхьаматэу Джарымэкъо Азмэт, хэбзэухъумэкIо къулыкъухэм, фондэу «Хэгъэгум иухъумакIо­хэр» зыфиIорэм, общественнэ организациехэм, «Юнармием» ялIыкIохэр.

ЗэIукIэм къекIолIагъэхэм за­фигъазэзэ, Геннадий Митрофановым къыхигъэщыгъ къалэр шъхьафит зашIыжьыгъэ мафэм Мыекъуапэ дэсхэмкIэ мэхьанэшхо зэриIэр.

— Хэгъэгу зэошхом тихэ­гъэгу ищыIакIи, итарихъи зэрихъокIыгъэх, унагъо пэпчъ лъыIэсыгъ. Илъэсныкъо фэдизрэ пыим ти­хэку зеIыгъым хьазабышхоу тицIыфхэм ащэчыгъэм гур егъэу­зы. А уахътэм къыкIоцI пыим тичIыпIэгъу мин пчъагъэ IэкIэкIодагъ. Мыщ фэдэ мафэм шъхьафитыныгъэр къытфыдэзыхыгъэхэу лIыхъужъныгъэшхо зезыхьагъэхэми, зэоуж илъэс­хэм тикъалэ зыпкъ изыгъэуцожьыгъэхэми «тхьашъуегъэ­псэу» ятэIо, — къыIуагъ Мые­къуапэ имэр.

Ащ зэрэхигъэунэфыкIыгъэмкIэ, Хэгъэгу зэошхом илъэхъан лIыхъужъныгъэу зэрахьагъэм Мыекъуапэ дэсхэр рэгушхох.

— Пшъэрылъэу тиIэр лIы­хъужъхэм яшIэжь дгъэлъэпIэныр, я Хэгъэгу шIу алъэгъоу, нэмыц-фашист техакIохэм тызэратекIуагъэм рыгушхохэу ныб­жьыкIэхэр тпIунхэр ары, — къыIуагъ Геннадий Митрофановым. — Тикъэралыгъошхо анахьэу зыгъэлъэшырэр цIыф­хэм язэкъотыныгъ, Хэгъэгум ащ шIулъэгъоу фыряIэр, тидзэ­кIолIхэм лIыхъужъныгъэ зэрэзэрахьащтым яцыхьэ зэрэте­лъыр ары. Тарихъ шIэжьыр къэу­хъумэгъэныр непэкIэ мэхьанэшхо зиIэ Iофыгъоу щыт. ХэушъхьафыкIыгъэ дзэ операциер зыщыкIорэ лъэхъаным тидзэкIолIхэр, офицерхэр, гуфа­кIохэр ти Хэгъэгу ишъхьафитыныгъэ, кIэлэцIыкIухэм мамыр щыIакIэ яIэным апае псэемыблэжьэу мэзаох. Мыекъуапэ шъхьафит зашIыжьыгъэ мафэм Урысыем идзэ текIоныгъэ къы­зэрэдихыщтымкIэ шIошъхъуныгъэу тиIэр нахь ерэгъэпыт.

ИскусствэхэмкIэ Мыекъопэ кIэлэцIыкIу еджапIэу N 1-м иеджакIохэми икIэлэегъаджэхэми къагъэхьазырыгъэ номерхэм хьакIэхэр арагъэплъыгъэх. Артист ныбжьыкIэхэми, гъэсакIохэми

Хэгъэгу зэошхом илъэхъан нэмыцхэм Мыекъуапэ заштэм къэлэдэсхэр зэрэзэкъоуцогъагъэхэр къаIотагъ.

Мамыр щыIакIэм пае зыпсэ зытыгъэ кIэлэцIыкIухэмрэ Iэтахъохэмрэ ацIэ зэIукIэм къыщыраIуагъ. Ахэм ащыщых Женя Поповыр, Виталик, Лена Голубитниковхэр ыкIи нэмыкIхэр. Къэзэрэугъоигъэхэр Хэгъэгу зэошхом щыфэхыгъэхэм зы такъикъэ афэшъыгъуагъэх. Концерт-реквиемым ыуж Гупчэ ме­мориалым дэжь къэгъагъэхэр кIэралъхьагъэх.

Александра Балабась.