Дунэе форумым хэлэжьагъэх
Щылэ мазэм и 25 — 26-м Московскэ къэлэ кIэлэегъэджэ университетым щыкIуагъ кIэлэегъаджэхэмрэ ушэтынхэр зышIыхэрэмрэ апае зэхащэгъэ я II-рэ Дунэе форумэу «Градиент» зыфиIоу хьисапым фэгъэхьыгъэр.
Ар Адыгэ къэралыгъо университетымрэ Тюменскэ къэралыгъо университетымрэ зэхащагъ. Iофтхьабзэм хэлэжьагъэх Архангельскэ, Ельц, Ереван, Воронеж, Мыекъуапэ, Москва, Казань, Ростов-на-Дону, Санкт-Петербург, Самарэ, Томскэ яапшъэрэ ыкIи ягурыт еджапIэмэ якIэлэегъаджэхэр. Хьисап гъэсэныгъэм гумэкIыгъоу къыздихьыхэрэр дэгъэзыжьыгъэнхэмкIэ еплъыкIэу щыIэхэр форумым щызэфахьысыжьыгъэх, модель гъэнэфагъэхэм ахэплъагъэх ыкIи ахэр зэрагъэцэкIэщтхэм зэдегупшысагъэх.
Форумым ипрограммэ хэтыгъэх зэдэгущыIэгъухэр, пленарнэ семинархэр, гъэсэныгъэ лабораториехэр ыкIи Iэнэ хъураехэр. ШIэныгъэ материалхэмкIэ лъэтегъэуцоу зэхащагъэр форумым изэфэхьысыжьэу хъугъэх. Ащ иIофшIэн джащ фэдэу хэхьагъэх купхэм къагъэлъэгъогъэ проектхэр, кIэлэегъэджэ ныбжьыкIэмэ еджапIэм щагъэфедэщт егъэджэн IэпыIэгъухэр. ШIэныгъэлэжьхэмрэ кIэлэегъаджэхэмрэ методикэхэмкIэ зэхъожьыгъэх, хьисапым хэхъоныгъэ егъэшIыгъэнымкIэ щыIэ программэхэм атегущыIагъэх. ХьисапымкIэ кIэлэеджакIохэм шIэныгъэу ягъэгъотыгъэн фаер кIэлэегъаджэу агъэхьазырхэрэм яшIэныгъэ зэрелъытыгъэр, тригонометрием зэпхыныгъэу дыряIэр егъэджэн Iофым кIэгъэгушIугъэнхэмкIэ зэрэбгъэфедэшъущтыр ыкIи нэмыкI лъэныкъохэм афэгъэхьыгъэ докладхэр форумым къыщашIыгъэх.
«Хьисапым акъылыр зы чIыпIэ зэрэригъэуцожьырэр» зыфиIорэ зэхэгущыIэжьымкIэ форумыр къызэIуахыгъ. Ащ къыщыгущыIагъэх Адыгэ къэралыгъо университетым иректорэу Мамый Даутэ, Московскэ къэлэ кIэлэегъэджэ университетым хьисапымкIэ ыкIи информатикэмкIэ и Институт ипащэу Сергей Каракозовыр ыкIи хьисап гъэсэныгъэмкIэ Московскэ гупчэм ипащэу Иван Ященкэр.
АКъУ-м иректорэу Мамый Даутэ пленарнэ семинарэу «Хьисап гъэсэныгъэр еджапIэм: хэхъоныгъэ егъэшIыгъэнымкIэ гугъапIэу щыIэр» зыфиIорэм доклад къыщишIыгъ.
«Сэнаущыгъэ зыхэлъхэр къыхэгъэщыгъэнхэмкIэ лъэныкъуищ IэубытыпIэ тшIырэр — сабыйхэр, ны-тыхэр ыкIи обществэр. Лъэныкъо пэпчъ Iоф дэшIэгъэн фае: сабыйхэм ашIогъэшIэгъонынэу, ны-тыхэр Iофым къыхэгъэлэжьэгъэнхэу ыкIи хьисапыр апшъэ ашIынымкIэ Iофтхьабзэхэр зэхэщэгъэнхэу», — къыкIигъэтхъыгъ Мамый Даутэ.
Хьисапыр еджапIэм щягъэхьыгъэнымкIэ ыкIи ащ зегъэушъомбгъугъэнымкIэ АКъУ-м IофшIагъэу иIэр тикIэлэегъаджэхэм форумым къыщаIотагъ. АКъУ-м и Кавказскэ хьисап гупчэ иотдел ипащэ Адыгэ Республикэм сэнаущыгъэ зыхэлъ сабыйхэр къызэрэщыхагъэщыхэрэм фэгъэхьыгъэ доклад къышIыгъ. АКъУ-м шIэныгъэ гъэнэфагъэхэмкIэ ыкIи цифрэ технологиехэмкIэ и Институт ипащэу Бэджанэ Светланэ студентхэм ягъэхьазырын фэгъэхьыгъэ программэм игъэцэкIэн къытегущыIагъ. АКъУ-м алгебрэмрэ геометриемрэкIэ икафедрэ икIэлэегъэджэ шъхьаIэу Юрий Карпенкэм олимпиаднэ хьисапымкIэ я 5 — 6-рэ классхэм ащеджэхэрэм апае агъэхьазырыгъэ онлайн курсым къеджагъ.
АКъУ-м ипресс-къулыкъу