Студентхэм я Мафэ фэгъэ­хьыгъэ мэфэкI зэ­хахьэ Мые­къопэ къэралыгъо технологиче­скэ университетым щыкIуагъ. 2023-рэ илъэсым нахь къахэщыгъэ студентхэм ацIэхэр къаIуагъ, ахэр агъэшIуагъэх.

[caption id="attachment_144894" align="aligncenter" width="800"] А. Iэшъын[/caption]

Илъэсым къыкIоцI мыщ ще­джэрэ студентхэм Адыгеим ыкIи Урысыем ащызэхащэгъэ зэнэ­къокъухэм зэрифэшъуашэу зы­къащагъэлъэгъуагъ.

Апшъэрэ еджапIэм ипроректорэу БрантI Мурат ректорым ыцIэкIэ студентхэм къафэгу­шIуагъ. Университетыр къызызэIуахыгъэр тыгъэгъазэм илъэс 30 зэрэхъугъэр ащ къыхигъэщыгъ. Лъэныкъо зэфэшъхьаф­хэмкIэ сэнаущыгъэ зыхэлъ сту­дентхэр мыщ зэрэ­чIэс­хэр къыIуагъ. IэкIыб къэралыгъохэм къарыкIыгъэ студентэу щеджэрэри бэ. Ахэм азыфагу зэзэгъыныгъэ, зэгурыIоныгъэ илъыным фэшI Iофтхьэбзэ зэфэшъхьафхэр зэхащэх. Ахэм ащыщ студентхэм ялъэпкъ культурэ къызыщагъэлъэгъорэ фестивалыр. Ащ чанэу хэлажьэхэрэм ацIэхэр къыра­Iуагъ, IэкIыб къэралыгъохэм къа­рыкIыгъэ студентхэм анэкIэ Мые­къуапэ зэралъэгъурэр къэ­зыушыхьатырэ сурэт техыгъэхэм­кIэ зэнэкъокъугъэх. ТекIоныгъэ къыдэзыхыгъэхэр агъэшIуагъэх.

— Илъэс къэс лъэныкъо зэ­фэшъхьафхэмкIэ сэнаущыгъэ зыхэлъ ныбжьыкIэу тиапшъэрэ еджапIэ щеджэхэрэм япчъагъэ хэхъо. Студентхэм шIэныгъэ куу зэрагъэгъотынымкIэ, ясэнаущыгъэ хагъэхъонымкIэ джы амал дэгъухэр яIэх, ахэр дэгъоу къы­зыфагъэфедэх. Социальнэ Iэпы­Iэгъу зэфэшъхьафхэри щыIэх, япроектхэр щыIэныгъэм щыпхыращын алъэкIы, — къыIуагъ БрантI Мурат.

Джащ фэдэу спортым ылъэныкъокIэ студентхэм гъэхъа­гъэу ашIыхэрэм ягугъу къа­шIыгъ, анахь чанхэр агъэшIуагъэх. МэфэкI мафэр ныбжьыкIэхэм гъэшIэгъонэу агъэкIуагъ.

ДЕЛЭКЪО Анет.