УФ-м и Президент ихэдзынхэр зыщы­кIощтхэ хэдзыпIэ чIыпIэхэм ягъэхьазы­рын Адыгеим щау­благъ.

АР-м хэдзынхэмкIэ и Гупчэ комиссие къызэрэщаIуагъэмкIэ, Iахьзэхэлъ обществэу «Ростелекомым» хэдзынхэр зыщы­кIощтхэ чIыпIи 137-мэ видео­камерэхэр атегъэуцогъэныр ригъэжьагъ.

Хэдзынхэр зэрэ­кIо­хэрэм, макъэхэр зэралъытэ­жьыхэрэм онлайн шIыкIэм тетэу алъыплъэщтых. Шъып­къагъэ хэлъэу хэдзын кампаниер зэхэщэгъэныр пшъэрылъ шъхьаIэу щыт.

Шъугу къэдгъэкIыжьын, УФ-м и Президент ихэдзынхэр мэ­фищэ, гъэтхапэм и 15-м къыщегъэжьагъэу и 17-м нэс, кIощтых. Хэдзын кампанием хэтхэм анэмыкIэу общественнэ лъыплъакIохэр щыIэщтых. 2018-рэ илъэсым къыщегъэжьагъэу АР-м и Общественнэ палатэ ахэр егъэхьазырых, пэшIорыгъэ­шъэу рагъэджагъэх. Участкэ пэпчъ нэбгырищ, къоджэ му­ниципалитетхэм общественнэ лъыплъэкIо тIурытIу ачIэ­тыщт.

УФ-м и Президент ихэдзын­хэм апае ренэу Iоф зышIэщт хэдзэкIо комиссие 265-рэ, пIэлъэ гъэнэфагъэкIэ Iоф зы­шIэщт участкэ хэдзэкIо комиссии 3 республикэм щызэхащэщт. Адыге­им ис хэдзэкIо мин 342,6-м ехъумэ амакъэ атынэу фитыныгъэ яI.

Республикэм ирайонхэм ыкIи икъалэхэм къащызэIуахыгъэ хэ­дзыпIэ участкэхэр щынэгъончъэным ылъэныкъокIэ зэрэхьазырхэр ауплъэкIунэу аублагъ.

ДЕЛЭКЪО Анет.