Унагъом иджэныкъо зыгъэлъэпIэрэ Цэйхэм яунагъо ­къуаджэу Къэбэ­хьаблэ щэпсэу.

Унагъом ис нахьыжъэу Аскэр илъэс 39-рэ ыныбжь, полицием истаршэ лейтенант. Ащ шыхэр ехъух, икIалэхэр игъусэхэу ахэм апылъынхэр якIас.

Аскэррэ ишъхьэгъусэу Рузанэрэ илъэс 18 хъу­гъэу щыIэныгъэ гъогум зэды­тетых, лъфыгъищ зэдапIу. Япшъэшъэ нахьыжъэу Ка­милэ илъэс 14 ыныбжь, тфы закIэкIэ я 9-рэ классым щеджэ, волонтер. «Адыг Лэндым» зэхищэрэ Iофыгъохэм чанэу ахэ­лажьэ. Олимпиадэхэм апэ­рэ чIыпIэхэр къащехьы, бэмышIэу «Сыбзэ сидунай» зыфиIорэ зэнэкъо­къум апэрэ чIыпIэр щиубытыгъ. Адыгэ пшъашъэм ышIэн фэе дэныр, бзэныр ыкIи дышъэ хэдыкIыныр зэрегъашIэх. ЕджапIэр къыухымэ хирург хъунэу зегъэхьазыры. ЯкIалэу Заур илъэс 12 ыныбжь, я 6-рэ классым дэгъу дэдэу щеджэ, спортым пылъ, та­пэкIэ ятэ илъэуж лъигъэ­кIуатэ шIоигъу. НахьыкIэ зэтIозитIоу Мэдинэрэ Мединэрэ илъэс тIурытIу аныбжь.

Яунагъо илъ шэн-хабзэ­хэм афэгъэхьыгъэу Цэй Рузанэ теупчIыгъ.

— ХьакIэпэгъокIыныр, лIэкъо зэпхыныгъэр дгъэпытэныр, адыгагъэм ишап­хъэхэр зетхьаныр ыкIи зэ­дэIужьыныр — ары ти­унагъо ихэбзэ шъхьа­Iэхэр, — хигъэунэфыкIыгъ бысымгуащэм. — ТинахьыкIэхэм лъапсэр ятэгъашIэ, нахьыжъхэм якъэбар афэтэIуатэ. Ахэм къапкъы­рыкIыгъэ лIэкъо чъыгыри Камилэ ыгъэпсыгъ, лIа­къом зызэриушъомбгъурэм тылъэплъэ.

Унагъом гушIуагъуи, гу­зэжъогъуи пэкIэкIыгъэх, ау зэгурыIоныгъэу азыфагу илъым, зэфыщытыкIэ дахэу зэфыряIэм яшIуагъэкIэ гумэкIыгъохэр зэранэ­кIынхэ алъэкIыгъ.

— КIэлэцIыкIухэм гъэсэ­ныгъэ дэгъу ягъэгъотыгъэ­ным, спортым пылъынхэм, ятворческэ амалхэм зау­шъомбгъуным, япсауныгъэ къэухъумэгъэным лъэшэу тыпылъ. Адыгэ намысыр чIамынэу псэунхэм фэтэпIух, — еIо Аскэр.

Цэй зэшъхьэгъусэхэм цIыфыгъэмрэ зэфыщытыкIэ дахэмрэ яунэгъо лъа­псэх, къадэхъурэм рыра­зэ­хэу мэпсэух.

Унэгъо зэгурыIожьхэм цIыфыгъэ шэпхъэ дахэр арылъ, лъэпкъ хабзэр къа­у­хъумэ, хэгъэгум инеущырэ мафэ лъапсэ фашIы.

Лъэпшъыкъо Фатим.